«Россельхозараны» Шимал Осетияда бёлюмюню келечилери, аны башчысы Тотров Олег бла бирге, кёп болмай Къабарты-Малкъарда коллегаларына къонакъгъа келгендиле. Мында болгъан кезиуде ала биопрепаратла чыгъарыу эмда урлукъчулукъ лабораторияны аккредитациясын этиу жаны бла сынам бла шагъырейленнгендиле.

Ведомствону КъМР-де бёлюмюню башчысы Куржиев Хасанбий ала ол ишлени къалай тындыргъанларын билдиргенди эмда мында производство жаны бла жетишимлерин туура этгенди.

Эки да бёлюмню специалистлери лабораторияда онгла бла шагъырейленип, аккредитациягъа къалай хазырланыргъа боллугъун сюзгендиле. Дагъыда урлукъланы качествосун тинтиу бла кюрешген ишчилени билимлерине багъа бериуню юсюнден сёлешгендиле.

Производстволу бёлюмню келечилери да къоншу региондан коллегаларына биопрепаратла чыгъарыуну, бу ишни къалай къураргъа боллугъуну юсюнден битеу билгенлерин айтхандыла. Тюбешиуню ахырында алагъа аккредитацияны жетишимли ётерге тежегендиле.

Улбашланы Мурат.