Бюгюнлюкде мобилизация бла байламлы лицензиялары болгъан биригиуледен специалистле  аскерге чакъырылсала да, ала болгъан адам санлары бла ишлерин бардырыргъа эркиндиле.  Аллай организациялагъа тазир  салынырыкъ тюйюлдю.  Аны юсюнден бегимни РФ-ни Правительствосуну Председатели Михаил Мишустин къабыл этгенди.

Мында сёз бир тюрлю иш бла кюреширча компаниялада адам саны жетерге кереклисини юсюнден барады. Мобилизацияны кезиуюнде аны ючюн  санкцияла бир къауум заманнга тохтатыллыкъдыла. 

Сотрудниклени саны азайтылгъанлыкъгъа, ол организацияны  ишине уллу хата салырча тюйюйлдю, ол санда къоркъуусузлукъгъа да. Болсада аллай предприятияла ишлерин жетишимли бардырырча  3-6 айдан кеч къалмай жангы специалистле табаргъа борчлудула. Ала бла  тийишли халда  келишимле да этилирге керекдиле.   

Мобилизациягъа чакъырылгъан специалистле уа  аттестацияланы бла  башха борчлу жумушланы сынаусуз автомат халда ётерикдиле. Аллай амал 48 усталыкъ бла байламлы бериледи. Ол санда ауур, жюк ташыгъан, пассажир транспортда ишлеген, гидрометеорология, билим бериу, туризм эм башха бёлюмледе къармашханлагъа.

Сагъынылгъан амалланы хайыры бла мобилизацияны кезиуюнде   ишчи жерлени сакъларгъа эм экономиканы да специалистле бла жалчытыргъа онг табыллыкъды.