Эсигизде эсе, быйыл май айны алларында республиканы Башчысы Казбек Коков Нальчикде жангы поликлиниканы къурулушу башланнган жерде бетон къуюу ишлени башлаугъа къатышхан эди. Андан бери алайда ол жумушланы аслам кесеги тамам этилгенди. Къурулушчула ол объектни мурдорун жарашдырып бошай турадыла: тюбюн бетон къуюп кючлендиргендиле, аны юсюне блокла тизгендиле. Энди уа къабыргъаларын къалай турадыла эмда темир конструкцияларын жарашдырадыла.

Жангы поликлиникада бир сменнге жарым минг адамны жумушларына къарарча боллукъду. Къабарты-Малкъарны Къурулуш эмда ЖКХ министерствосунда айтханларыча, бизни республикада быллай тынгылы объект ахыр отуз жылны ичинде биринчи кере ишленеди. Ол кеси да медицина тинтиулени кёп тюрлюлерин бардыргъан эм кючлю амбулатор-диагностикалы арпа боллукъду дейдиле. Объектни къурулушу РФ-де саулукъ сакълауну биринчи бёлюмюн айнытыу программаны чеклеринде барады.

Министерство дагъыда Элбрус элде больница, Кубада уа амбулатория ишлете турады. Шёндю дагъыда Нальчикде онкология диспансерни къурулушу, Бахсан шахар округда поликлиниканы жангыртыу, Аушигерде кёп болмай къурулущу бошалгъан амбулаторияны битеу  медицина оборудованияла бла жалчытыу ишле да барадыла.

Улбашланы Мурат хазырлагъаннды.