Бахсан шахар округну тийресинде мюлкледе тирлик жыйыу къыстау барады. Муниципалитетни жер-жерли администрациясында айтханларына кёре, быйыл анда кюзлюкле 2235 гектарны аладыла. Ол санда 1814 гектары аллай будайды, къалгъаны уа арпады. Аланы асламысын ёсдюрюу бла Шогенцуков атлы эл мюлк кооперативде эмда «Заря» ООО-да кюрешедиле. Энтта да 272 гектарда кюзлюк будайны урлугъун энчи предпринимательле эмда элчи мюлкле сепгендиле. Мал ашха жараулу битимле да 170 гектарны аладыла.

Сагъынылгъан кооперативде бюгюнлюкге 225 гектар жерде арпаны оруп бошагъандыла. Аны тирликлилиги 49 центнерге жетеди. Озгъан жылны кёрюмдюсю бла тенглешдиргенде, онбир центнерге кёбейгенди.

Ишде юч комбайн бла сегиз автомашина хайырланыладыла. Экинчилери мирзеуню тохтаусуз ташыйдыла. Алай аладан эсе уа тирлик жыйыуда баш магъананы тутханла – адамладыла. Хар нени да жик-жиги бла этерге кюрешгенле, жууаплы къармашханла – аласыз бу ишни къыйматы чыгъарыкъ тюйюлдю, деп белгилейдиле муниципалитетни администрациясында.

Омарланы Мурат хазырлагъанды.