РФ-ни МЧС-ини КъМР-де Баш управлениясыны таматасы Михаил Надёжинни журналистле бла тюбешиуюнде сёз ведомство быйылны биринчи жарымында къалай ишлегенини юсюнден баргъанды.
Бек алгъа от тюшюу бла байламлы болум ачыкъланнганды. Озгъан алты айны ичинде республикада аллай зат 573 кере болгъанды. Былтыр бла тенглешдиргенде, ол 3 процентге кёпдю.
- Баш сылтау адамланы уллу кёллюлюклери бла байламлыды. Аны айтханым, бизде халкъ къургъакъ хансны бла кир-кипчикни кеси аллына кюйдюрюрге бек ёчдю. Алай бла от тюшюу 290 кере болгъанды. Административ жууаплыкъгъа аны ючюн кёпле тартылгъандыла, - деп чертгенди Михаил Надёжин.
Бу ишде къутхарыучулагъа бла от ёчюлтюучюлеге 1 июльдан ишлеп тебиреген жангы закон болушур деген умут барды. Анга тийишлиликде, эркин этилмеген жерледе от этиу ючюн уголовный жууапха тартыу белгиленеди.
Алты айны ичинде от ёчюлтюучюле 823 кере жолгъа чыкъгъандыла. Былтырдан эсе асламды ол. 180 кере ала жоллада аварияланы кезиулеринде отланы ёчюлтюуге баргъандыла. Кюн сайын, дежурствогъа саулай да республикада 278 адам бла 57 техника чыгъадыла.
Ызы бла сёз Минги тауну тийресинде болумну юсюнден баргъанды. Михаил Владимирович билдиргеннге кёре, «Онбиреуленни ышыгъына» «Кавказ.РФ» ремонт этгенден сора, анда 10 къутхарыучуну орнатыр онг боллукъду. Ол а тауда къутхарыу ишлеге шёндю кетген заманны иги кесекге аз этер онг берликди. Бюгюнлюкде анда жаланда 4 адамгъа жер барды. Къутхарыучула жолгъа Терс-Къолдан атланадыла. Ала белгиленнген жерге жетгинчи 1,5 сагъат кетеди.
Сёз жай кезиуде жууунурча жерлени юслеринден да баргъанды. Бюгюнлюкде адамлагъа жаланда 6 суу жагъаны хайырланыргъа эркин этиледи. Былтыр да, быйыл да сууда батханланы саны бирер адамды. Эркин этилген пляжлада аллай жарсыула тюбемейдиле.
- Аны себепли ата-аналадан сабийлери къайры жууунургъа баргъанларына аслам эс бёлюрлерин излейбиз. Хата азданды, - дегенди регион управленияны таматасы.
Дагъыда жайда чыранла эрип, ырхыла келирлерине къоркъуу кючленеди. Былтыр бла тенглешдиргенде, къар азыракъды. Алай Гирхожан суу саулай да Кавказда эм къоркъуулу болгъанын эсге ала, аны энчи контрольда тутадыла. Насыпха, шёндю ол тынч халдады. Башкара кёлге да сакъ болургъа керекди. Анга да тийишли специалистле, вёртолёт бла барып, тинтип тюшгендиле. Ары жол тап халгъа келтирилгенлей, техниканы чыгъарып, тёгерегин тапландырыргъа керек боллукъду. Толусунлай алып айтханда, быйыл ол да къоркъуулу тюйюлдю.
Ызы бла Михаил Надёжин журналистлени сорууларына жууапла бергенди. Хамидия элде ишлене тургъан от ёчюлтюучю бёлюмню мекямыны къурулушуну юсюнден соруугъа ол аны ахырына жетдирирге кёп къалмагъанды, деп жууаплагъанды.
- Аны биз кесибиз да ашыгъып сакълайбыз. Бюгюнлюкде Терк районда жаланда шахарда орналгъан бир бёлюм барды. Ол а бек азды. Прохладна районда да хал алайды. Анда да часть жетишмейди. Бир-бир эллеге 40 минут чакълы барыргъа тюшеди. Кесигиз ангылагъандан, ол заманнга битеу объект кюйюп бошаргъа боллукъду. Шёндю талай элде дежурный постла ишлейдиле. От ёчюлтюучюле, бир бирлерин алыша, суткала бла ишлейдиле. Аны себепли жангы къурулушну бек къаты сакълайбыз, - дегенди ол.
Журналистле дагъыда гидлени бла эскурсоводланы ишлери бла байламлы жангы жорукъла къалай ишлегенлерин билирге излегендиле. Михаил Владимирович айтханнга кёре, ол иш былтыр къабыл этилген федерал закон бла къуралады. сурамла да ёсгендиле.
- Закон анданда хайырлы ишлер деп умут этеме. Къутхарыучуланы да ишлери азыракъ боллукъду ол кезиуде, - ден чертгенди ол.
Таппасханланы Аминат.
