Алгъаракъда Тырныауузда жашагъан Тебаланы Муслимни бла Валентинаны юйюрлеринде бешинчи сабий туугъанды. Не жашырыр кереклиси барды, бусагъатда миллет юйюрледе да эки-юч сабий мардады, алгъынча уллу юйюрле хазна жокъдула. Тебалары уа: «Къарындашла бла эгечле бир бирлерине билеклик этерле, жер башында адам жарлылыкъдан сора жарлылыкъ жокъду», - дейдиле.
Тохтаусуз ёсюу
Муслим Къабарты-Малкъар къырал университетни экономика факультетин эм Чечен университетни нефть бла байламлы факультетин бошагъанды, МЧС-де къутхарыучу болуп ишлейди. Жарсыугъа, арт заманда къутхарыучуланы ишлери болмагъанча кёпдю, Минги таугъа хазырланмай баргъанланы саны ёсе барады. Бир-бирле уа регистрация окъуна этмейдиле, бир палах болса уа, ала не жол бла баргъанларын, къалайда тохтагъанларын тапхан къыйынды. Муслим, бу жууаплы ишин тамамлагъандан сора да, сабийлеге эс бурады, хар бирине татлы тенг бола биледи. Муслимни бла Валентинаны оюмларына кёре, сабийге тынгылай, анга хурмет эте билирге керекди. Тиширыу психологду, анга билими кюн сайын болушады.
«Бир-бирле анагъа билим неге керекди? дейдиле. Мени оюмума кёре уа, кимден да бегирек анагъа керекди билим, ол сабийле ёсдюреди, - дейди Валентина. – Мен бусагъатда да окъугъанлай турама. Косметологиягъа сейирим барды, окъугъанма бу жаны бла да, кесим салон ачханма. Косметолог, лазер эпиляция, бетни эм санны - чархны жашыракъ этиу – хар бирине да юйреннгенме. Мени, аталарыны тохтаусуз окъугъаныбызгъа къарап, сабийле да айныргъа итинедиле. Амина университетни экинчи курсундады, Аллах айтса, фармацевт боллукъду. Фатима алтынчы классдады, тепсерге, сурат этерге сюеди. Лейла экинчи классдады, суратлау литератураны кёп окъуйду. Мухаммад тёртюнчю сабийди, Исса уа – бешинчи. Къызла къарындашчыкъларын ёсдюрюрге болушадыла. Адам адамлыкъгъа, халаллыкъгъа юйюрюнде юйренеди».
Бирлик
Валентина бла Муслим тауда танышхандыла. Къыз анасы эм эгечи бла солуй эдиле, алай юйге барыргъа жумушла чыгъадыла да, Валентинаны эгечи бла Муслим болгъан машинагъа олтуртадыла. Ол кюнден сора бир айны ичинде тюбеше-тюбеше тургъандыла. Жашха жыйырма бла бир жыл болгъан эди, къыз а школну бошап, окъуу къайгъылы…
Муслим Валентинаны къачыргъанда, ызындан адамлары келген эдиле, сыйыргъан этебиз, деп. Аланы ангыларгъа боллукъ эди: къыз билим алып, аягъы юсюне турса сюе эдиле. Алай Муслимни ыннасы: «Угъай, сизни къызыгъыз энди бизникиди. Окъутхан да кесибиз этерикбиз», - деп къояды. Той да ресторанда угъай, юйде баргъан эди. Эртте заманладача, сау ай! Биринчи кезиуде жаш юйюр Муслимни атасы, анасы, эгечи, къарындашы бла жашагъандыла. «Ол бирге тургъан заманыбыз бизни бирлешдиргенди», - дейди Валентина. Бир жылдан къызчыкъ туугъанды, эки жылдан а ала кеслерини фатарларына кёчгендиле. Бусагъатда уа жангы юйлерине ремонт эте турадыла.
Тилек
Валентина Нальчикде ёсгенди, алгъа Тырныауузгъа юйреналмай тургъанды. Алай къысха заманны ичинде мында тамырланнганды. «Тырныауузну адамлары чексиз халалладыла. Бусагъатда не шахардан, элден да мен Тырныауузну сайларыкъма», - дейди.
Муслим бла Валентина дуниягъа мамыр жашау тилейдиле, сабийлерине тынгылы билим берирге умут этедиле. Бешиси да тюз боюнлу, жамауатха къуллукъ этген адамла болурларын излеп, кюн сайын ата-ана борчларын толтурууда къарыуларын аямайдыла. «Бу дунияда хар игилик да сюймекликни мурдорунда болады. Биз сабийлени бир бирлерин сюерге, болушургъа, къатларында адамлагъа да хурмет этерге юйретебиз, - дейди Валентина. – Эгечи-къарындашы болгъан не болумлада да абызырамайды, адамларына базынады. Хар юйюрде да сабийле кёп болсунла».
Байсыланы Марзият.
Суратда:Валентина (сол жанында) бла Муслим къызлары бла.
