КъБР-м Узыншагъэр хъумэнымкIэ и министерствэм «ЦIыхухэм япэ медицинэ дэIэпыкъуныгъэхэр щыхуащIэ IуэхущIапIэхэр къэгъэщIэрэщIэжын» щIыналъэ проектымкIэ «Нива», «Гранта» автомобилу 16 къищэхуащ. Ахэр яIэрыхьэнущ республикэм и райони 7-м хыхьэ къуа­жэхэм дэт амбулаторэхэмрэ ФАП-хэмрэ. Федеральнэ бюджетым къыхэкIыу а Iуэхум хухахащ сом мелуани 10,8-рэ. 

Машинэхэр къагъэсэбэпынущ икIэщIыпIэкIэ дэIэпыкъуныгъэ хуэныкъуэ сымаджэхэм я унэм участковэ дохутырхэр щыкIуэкIэ. Апхуэдэуи а автомобилхэмкIэ республикэм и къуажэ пхыдзахэм щыпсэухэу зи узыншагъэм нэхъ куууэ кIэлъыгъэплъын хуейхэр район сымаджэщхэм ирагъэшэнущ. 
Прохладнэ районым и медицинэ IуэхущIапIэхэм яIэры­хьэнущ автомобили 5, Бахъсэн щIыналъэм - 4, Шэджэм, Аруан куейхэм - тIурытI, Лэскэн, Шэрэдж, Iуащхьэмахуэ   районхэм - зырыз.
ЩхьэщэмыщI Изэ.