КъБР-м и Iэтащхьэ КIуэкIуэ Казбек лэжьыгъэ IуэхукIэ хуэзащ Къэрал статистикэмкIэ федеральнэ къулыкъущIапIэм Кавказ Ищхъэрэ федеральнэ щIыналъэм щиIэ управленэм и унафэщIым и къуэдзэ Гъащтэ Аурикэ. Ахэр тепсэлъыхьащ статистикэмкIэ республикэ IэнатIэм нэгъабэ иригъэкIуэкIа лэжьыгъэм кърикIуам.
IуэхущIапIэр нэхъыщхьэу зиужь итахэм ящыщщ 2021 гъэм жэпуэгъуэм и 15-м щегъэжьауэ щэкIуэгъуэм и 14 пщIондэ ирагъэкIуэкIа Урысейпсо къыхэтхыкIыныгъэр. Иджы япэу Iуэхум къыщагъэсэбэпащ бжыгъэхэр зи лъабжьэ технологиер. КъыхэтхыкIыныгъэм къыхаша волонтёрхэр сэбэп хъуащ планшетхэм унагъуэхэм ятеухуахэр иратхэнымкIэ. Апхуэдэуи Iуэхур нэхъ тынш ищIырт «Къэрал Iуэхутхьэбзэхэр» сайтымкIэ зебгъэтх зэрыхъум.
КъыхэтхыкIыныгъэм щызэхуахьэсхэр къэрал гъэзэщIакIуэ властым сэбэп хуохъу унафэ пыухыкIахэр къащтэнымкIэ. Псалъэм къыдэкIуэу жыпIэмэ, псэукIэм, экономикэм зегъэужьыным ятеухуа проектхэм, ухуэныгъэхэм, гъуэгу телъхьэным, псэупIэ ухуэным, еджапIэ, сабий IыгъыпIэ къызэIухыным, газ, псы, ток зэрыкIуэ бжьамийхэмрэ кIапсэхэм-рэ дэлъхьэным, жылагъуэ транспортым и зекIуэкIэр убзыхуным, нэгъуэщI Iуэхугъуэхэми лъабжьэ яхуэхъур къыхэтхыкIыныгъэм къигъэнаIуэ бжыгъэхэрщ.
2022 гъэм и япэ мазищым къулыкъущIапIэм Iуэху зыбжанэ щызэфIахащ зэхуахьэсахэр зыхуей хуэгъэзэнымкIэ. Урысейм и хэгъэгухэм щрагъэкIуэкIа къыхэтхыкIыныгъэм кърикIуахэр мэлыжьыхьым къытридзэну и мурадщ Росстатым. ИужькIэ зэхуахьэсахэр Iуэхугъуэ пыухыкIахэм ятеухуауэ гуэшауэ утыку къызэрырахьэнур жиIащ Гъащтэ Аурикэ.
Лэжьыгъэр щекIуэкIым къагъэсэбэпа планшет 2000-р дохутырхэмрэ егъэджакIуэхэмрэ иратыжыну я мурадщ, псори зэфIэкIрэ итхэр ирагъэкIыжмэ.
Къэбарт Мирэ.