Налшык и Макъамэ театрым щекIуэкIащ «Хрустальные звёздочки-2022» урысейпсо фестиваль-зэпеуэм и щIыналъэ Iыхьэр.
А зэпеуэр Урысей ФССП-м 2007 гъэ лъандэрэ ирегъэкIуэкI хабзэхъумэ, къэрал нэгъуэщI органхэм я лэжьакIуэхэм я сабийхэм папщIэ. Илъэс 15 хъуауэ фIым я фIыжхэм ират «Орлёнок» сабий центрым зэрызыщагъэпсэхуну путёвкэхэр, зэпеуэм щытекIуэхэм Iэмал яIэщ я зэфIэкIыр ар- тист цIэрыIуэхэм ящIыгъуу ягъэлъэгъуэну.
Иджырей зэпеуэм хэтащ ныбжьыщIий - Урысей ФССП-м и управленэу республикэм щыIэм, УФСИН-м, республикэм Лъэпкъ Iуэхухэмрэ жылагъуэ проектхэмкIэ и министерствэм, Аруан район администрацэм я лэжьакIуэхэм я сабийхэр, апхуэдэуи КъБР-м щыIэ МВД-м ЩэнхабзэмкIэ и центрым и гъэсэнхэр. Концертым къеблэгъат Донецк ЦIыхубэ Республикэм щыщ, Къэбэрдей-Балъкъэрым щыпсэу и Iыхьлыхэм я деж къэкIуа Украинская Софие.
Зэпеуэм щытекIуащ бэрэбанкIэ кавказ ритмхэр зыгъэIуа Къазий Дамиррэ Моцарт и «Менуэт»-р аккордеоным къизыгъэкIа Тохъу Самирэрэ. КъэпщытакIуэхэм ягу ирихьащ «Фантазия», «Вдохновение» хореографие гупхэм ягъэлъэгъуа теплъэгъуэхэри. Уэлджыр Миланэ и уэрэд жыIэкIэми дэтхэнэри итхьэкъуат.
Зэпеуэм хэта дэтхэнэми саугъэтхэр иратащ, ауэ дамыгъэ нэхъ лъапIэхэр къэзылэжьахэм ахэр мыгувэу къыщыIэщIалъхьэжынущ Суд приставхэм я федеральнэ къулыкъущIапIэм и управленэу КъБР-м щыIэм. Ахэр «Хрустальные звёздочки-2022» урысейпсо фестиваль-зэпеуэм и федеральнэ Iыхьэм Мэзкуу щыхэтынущ.
Дыгулыбгъу Жантинэ.