Къабарты-Малкъар Республиканы Башчысы Казбек Коков муниципал къуралыуланы таматалары, КъМР-ни Правительствосуну келечилери бла оператив соруула бла байламлы кенгеш бардыргъанды. Анга КъМР-ни премьер-министри Мусукланы Алий, Россей МЧС-ни КъМР-де Баш управлениясыны начальниги Михаил Надежин да къатышхандыла.

Федерал эм регионал проектлени бардырылыуларыны юсюнден Мусукланы Алий билдиргенди. Бюгюннгю кюннге проектлени барысын да контрактациясы этилинип бошалалады, объектлени бир ненчасында ремонт эм къурулуш ишле башланнгандыла. Алай бла «Билим бериуню айнытыу» къырал программаны чеклеринде быйыл элледе 19 билим берген махкемени тынгылы ремонту белгиленеди. «Хар сабийни жетишими» федерал проектге кёре 13 мектепде спорт залланы неда энчи спорт сооруженияланы ремонту бардырыллыкъды.

Кенгешде муниципалитетлени, жууаплы министерстволаны эм ведомстволаны от тюшюу эмда суу басыу кезиуге хазырлылыкълары да сюзюлгенди.

«2022 жылны аллындан агъачлада от тюшюуле болмагъандыла», – деп билдиргенди КъМР-ни табийгъат къолайлыкъ эм экология министри Шауаланы Илияс. Ол от тюшюу къоркъуусузлукъну жалчытыуну чеклеринде агъачда жолланы, минерализация этилген от тюшюуге къажау ызланы къуралгъанларын, аланы тазалагъанларын, от тюшгенде суу алырча эм алагъа машина барырча онгланы жарашдыргъанларын белгилегенди.

Агъачлагъа къарарча 4,5 километр узунлугъу болгъан 114 маршрут къабыл этилгенди. Ючюнчю халлы 3 лесопожар станция къуралгъанды, ала жылны узуну эм сау сутканы ишлегенлей турадыла. Регион диспетчер службаны да, анда уа 48 адам ишлейди, сау сутканы урунуу низамгъа кёчюргендиле. От тюшюулени ёчюлтюрча эм аланы болумларын кетерирча МЧС-ни къатышыуу бла юйрениуле бардырыладыла.

Республикада суу кётюрюлюуню кезиуюн зарансыз оздурурча аслам жумушла тамамланадыла. Сёзге айтханда, Заюково элни чеклеринде Бахсан черекде тийишли ишле, Октябрьское элни чеклеринде Черек сууда эм Тырныауузда Бахсан сууда суу ызланы тийишли халгъа келтириу эм терен этиу ишле. Эски Черек эм Тёбен Черек эллени араларында жагъаланы кючлеу ишле тамамланнгандыла. Гирхожан-Сууну беженинден Бахсан суугъа дери ырхы келиулени тыйгъан сооружение тазаланнганды. Бу проект 2021 жылда Пятигорскеде КъМР-ни Башчысы Казбек Коков бла тюбешиуню эсеплерине кёре, РФ-ни Правительствосуну Председатели Михаил Мишустин себеплик этип, Россейни Правительствосуну болушлугъу бла бардырылады.
 
Быйыл Акъ-Суу элни эм «Коммунальник» бахчачылыкъ мюлкню тийресинде Нальчик сууда эм Псынабо сууда (биринчи урум) суу ызланы тийишли халгъа келтириу жумушла тамамланырыкъдыла. «Энчи суу байлыкъланы сакълау» федерал проектни чеклеринде быйыл Элбрус районну тийресинде 13 километр узунлукъда Бахсан сууну ызын тазалау ишле башланырыкъдыла. «Проектни бардырыу 3 жылгъа саналыпды, – деп белгилегенди Шауаланы Илияс. – Быйыл биринчи урумда черекни 2,6 километри тазаланырыкъды».

Михаил Надежин билдиргеннге кёре, быйыл уллу суу кётюрюлюулеге къоркъуу жокъду, алай дагъыда черекле бу кезиуледе къоркъуулудула. Ол энчи эсни муниципал администрациялада диспетчер службаны ишлерини магъаналылыкъларына бургъанды.

Казбек Коков район эм шахар округланы администрацияларыны таматаларына суу кётюрюлюу эм агъач от тюшюулени къоркъуулары уллу болгъан кезиуде контрольну кючлерге буюргъанды, дагъыда хар муниципалитетде терк жетиуню, ол санда къыйын болумлада адамланы билдириулерине кёре, тохташдырылгъан излемлерине тийишли диспетчер пунктланы жалчытыргъа да.