ЩIыуэпс

Къэбэрдей-Балъкъэр щIыуэпсым и къулеигъэхэм ящыщщ Къуртимэз. Гектар 20-кIэ зызукъуэдия мэз Iувым мыхьэнэшхуэ иIэу ягъэувауэ къогъуэгурыкIуэ. Ар Лэскэн щIыналъэм и ипщэ-къуэкIыпIэ лъэныкъуэмкIэ щыIэщ, Урыху къуажэм километри 3-кIэ пэжыжьэу. Къуртимэз жыг зэхуэмыдэхэр щокI, мыIэрысей, кхъужьей, Iущхьэмышх, зэрыджэ, къинэмыщIхэми ущрохьэлIэ.

Нобэ Къуртимэз щхьэкIэ Куртимэс жызыIэхэр щыIэщ, сыт абы къикIыр жыпIэмэ, жэуап къуамытыжыфу. ЗэрытщIэщи, псалъэм адыгэбзэкIэ къимыкIIамэ, ар адыгэбзэкъым. ЗэхэдгъэкIынщ Куртимэсымрэ Къуртимэзымрэ къежьапIэ яхуэхъуар. 
ЗэрыжытIащи, цIыхухэр Къуртимэз сытым дежи хуэсакъыу, яхъумэу нобэм къэсащ. А гулъытэри зэман жыжьэм къыщожьэ. Къугъуэлъкъупщхэм ящыщ гуэрым и мылъкум хиубыдэрт мэзри, гу лъитащ абы бзу лIэужьыгъуэ куэд зэрыщIэсым, щIыпIэр яфIэтыншу ахэр зэрыгъуалъхъэрейм. ЩIыуэпсым пщIэшхуэ хуэзыщI пщым унафэ ищIащ мэзым и Iэшэлъашэм фоч щамыгъэуэну, къуртхэр ямыгъэщтэну, щакIуэ зыри щIэмыхьэну, уеблэмэ псоми я къару зэхалъхьэу мы щIыпIэр яхъумэну. Пщым и гупыжыр цIыхубэм даIыгъащ, и унафэри ягъэзэщIащ. ЗэрыжаIэжымкIэ, пщыр апхуэдизкIэ ирипагъэт мэзым и дахагъэмрэ и къулеигъэмри, хьэщIэ къылъихьамэ, «къурт и мэз» ишэрти, зригъэплъыхьырт. Ауэрэ мэзым къыхуэнащ Къуртимэз фIэщыгъэцIэр. ИужьыIуэкIэ ар урысыбзэ къэпсэлъыкIэм къытенами, Урыху и гъунэгъу осетинхэм я жыIэкIэм техьами хэт ищIэрэ, Куртимэс хъуащ. 
Ди жагъуэ зэрыхъунщи, Къугъуэлъкъур апхуэдизу дэзыхьэхыу щыта мэз джэд бжыгъэншэхэр Къуртимэз куэд щIауэ щIэсыжкъым. Ауэ нобэр къыздэсым цIыхухэм а щIыпIэм пщIэ хуащI, яхъумэ, жылэ зэхуэсхэмрэ лъэпкъ дауэдапщэхэмрэ щрагъэкIуэкI. 
 

Фырэ Анфисэ.