КъМР-ни Башчысы Казбек Коков Шимал Кавказда миллет къоркъуусузлукъну жалчытыугъа жораланнган кенгешни ишине къатышханды. Аны РФ-ни Къоркъуусузлукъ советини Секретары Николай  Патрушев бардыргъанды.

 Грозныйде ётген кенгешге  РФ-ни Президентини Шимал-Кавказ федерал округда толу эркинликли келечиси Юрий  Чайка, Россейни Къоруулау министерствосуну, ФСБ-сыны, МВД-сыны, МЧС-сини, Генеральный прокуратурасыны, Саулукъ сакълау министерствосуну, Транспорт министерствосуну, башха федерал министерстволаны бла ведомстволаны келечилери да къатышхандыла.

 Кенгешде сёз  Украинаны демилитаризациялар эмда денацификациялар муратда бардырылгъан энчи аскер операцияны кезиуюнде, Россейге экономика эмда политика жаны бла да уллу къысыулукъ этилген болумлада миллет къоркъуусузлукъну къалай бла жалчытыргъа боллугъуну юсюнден  айтылгъанды. Андан сора да, къырал, экономика эмда жамауат къоркъуусузлукъну, халкъла аралы экстремист эмда террорчулукъ къауумлагъа къажау сюелиуню амаллары сюзюлгендиле. Инфраструктура объектлени, адамла кёп жыйылыучу жерлени террорчулукъ ишледен къоруулаугъа артыкъда сакъ болургъа кереклиси чертилгенди.

 Халкъны къыйын табийгъат эмда техноген болумладан сакълаугъа да энчи эс бурулгъанды. Миллет эмда дин экстремизмге арталлыда жол бермезге, Россейни жеринде къыралныкъы эмда коммерциялы болмагъан  биригиуле право низамгъа къажау  ишлерин бардыралмазча мадарла этерге кереклисини юсюнден айтылгъанды.

Юсюпланы Галина хазырлагъанды.