Кёп болмай Къабарты-Малкъар къырал университетни право, экономика эм финансла институтунда  9-11 класслада окъугънланы арасында  финансла жаны бла олимпиада болгъанды. Аны юсюнден бизге вузну пресс-службасындан билдиргендиле.

- Олимпиаданы магъанасы  школчуланы финансла жаны бла билимлерин ёсдюрюргеди. Кёпле   къолларында  ахчаны  файдалы болурча хайырлана билмейдиле. Аны бла бирге бюгюнлюкде  рынокда болумдан,  финанс жумушладан ангыламай,  жетишимли болургъа къыйынды,- дейди право, экономика эм финансла институтну юйретиу, усталыкъ сайлау эм урунуу  жаны бла проректору Мирзоланы Жанна.

Олимпиадада финансла  бла байламлы  хыйлачыланы тинтирге да болушхандыла.  Ол санда биринчи заданиягъа кёре тестледе  банк карта, мюлкню залоггъа салыу, багъалы къагъытла, инфляция дегенча  соруулагъа жууапла  бергендиле.  Экинчи кесегинде уа  жаш адамла «Бюгюннгю банк карталаны игилиги бла аманлыгъы», «Товарлагъа скидка: хайырланыучулагъа къайгъырыу», «Келир заманда ахча система къаллай боллукъду?»,  «Тёлеуле этгенде магъаналы жорукъла» дегенча темалагъа эссе жазаргъа керек болгъандыла. 

Олимпиаданы юсюнден школчула  оюмларын да билдиргендиле.

- Бу жол  хорлап балла алсам,   КъМКъУ-гъа киргенде ахшы себеплик этерикди. Мени муратым   «Архитектура» бёлюмде окъургъады.  Муну аллында «Инженерча сагъыш эт» конкурсха къатышып, «Архитектура эм дизайн» номинацияда экинчи жерни алгъанма,- дейди    Нальчикни 18-чи номерли орта школуну окъуучусу  Громовик Денис.   Аны биргесине окъугъан Бирсов Инал а  эришиулеге  кесини финансла жаны бла билимин сынаргъа келгенин, аны бла бирге, балла алыргъа аламат  онг табылгъанын да айтханды.   «Бу жол университетде биринчи кере болгъанма, хар нени да бек жаратханма.  Келир заманда, баям, университетни юрист бёлюмюне кирлик болурма,- деп къошханды ол. 

Нальчикни 6-чы номерли орта школуну окъуучусу Евгений Кузнецов  а финансла жаны бла бёлюмге бюсюрегенин, эришиуледе  хорлап КъМКъУ-ну  «Экономика» бёлюмюне кирирге сюйгенин да букъдурмагъанды. 

Эсге сала айтсакъ,  11 марта  15.00 сагъатда  университетни  Социал-гуманитар институтуну корпусунда  «Орус маданиятны дуниясы» аты бла маданиятдан  олимпиада боллукъду.

Магометланы Сулейман.