ДАРАЖАЛЫ ЭРИШИУДЕ АЙЫРМАЛЫГЪА САНАЛГЪАНДЫЛАБу кюнледе КъМР-ни Жарыкъландырыу, илму эмда къарар адамсыз къалгъан сабийле тургъан интернатыны (Нартанда) Заюково элдеги филиалыны келечилерин мектеп «Доброшкола-2021» Битеуроссей конкурсда ючюнчю жерге тийишли болгъаны бла байламлы къууанчлы тюбешиу озгъанды. Аны кезиуюде сагъынылгъан интернатны директору Алисултан Алишановха диплом берилгенди. Андан сора да, филиалны сабийлени аш хазырлау хунерге тюшюндюрген устазы Залина Валерьевна Шомахова бла къызчыкъланы быстыр тигерге юйретген Мадина Беталовна Карданова да саугъаланнгандыла. Дагъыда сагъынылгъан эришиуню лауреаты экинчи номерли энчи (коррекециялы) школ-интернат болгъанды. Аны келечилерине да дипломла, багъалы саугъала берилгендиле. Заюководагъы интернатда бюгюнлюкде саулай да республикадан сексен сабий турады. Аладан онусуну интеллектуал жаны бла энчиликлери бардыла. Жашчыкъла бла къызчыкъла мында тогъузунчу классха дери билим аладыла. Алагъа окъуу программа уа, энчиликлери эсге алынып, тынчлыкълы болурча жарашдырылгъанды. Мында жаш тёлюню юйретирча, окъутурча устазла да жетишедиле. Сабийлени тюрлю-тюрлю усталыкъ хунерлеге-юй сюртюрге, бояргъа, плитка салыргъа, аш хазырларгъа, кийим тигерге дегенча, тюшюндюредиле. Ала къоллары бла абери эте билир жанына асламыракъ къайгъырадыла. Алай бла уа, ала артда иш тапмай, баш кечиндиралмай, къабыргъаларын жашаугъа келишдиралмай къаллыкъ тюйюлдюле. Башхача айтханда уа, интернатда уруннганла мында тургъанланы жамауат арасында кеслерин жюрюте билирлерине жууаплылыкъны толусунлай сезедиле. Эсигизге салайыкъ, былтыр «Билим бериу» миллет проектни «Шёндюгюлю школ» федерал проектин жашауда бардырыуну чеклеринде республикада эки энчи (коррекциялы) школ-интернатны-Приближная станциядагъы эмда Заюководагъы филиалны-ырысхы-техника мурдорлары жангыртылгъандыла. 2021 жылда сагъынылгъан эришиуге къыралны 77 регионундан 139 билим берген махкеме къатышханды. Аланы араларында уа бизни республикадан эки интернат да болгъандыла. Конкурсха къатышып, анда белгиленнгенлерини хайыры бла уа, ала кеслеринде аслам затны иги жанына тюрлендирирге, оборудованияны жангыртыргъа, бусагъатдагъы технологияла бла ишлерча онгну табаргъа боллукъдула. Саулай алып айтханда уа, саулукълары бла байламлы энчилликлери болгъан сабийле тургъан интернатлагъа юч жылдан бери быллай эришиуню къуралгъаныны эмда бардырылгъаныны къыйматы уллуду.
Мокъаланы Зухура.
Поделиться: ЧИТАТЬ ТАКЖЕ:
|