КъБР-м узыншагъэр хъумэнымкIэ и министр Къалэбатэ Рустам и лэжьапIэ пэшым щыIущIащ республикэм и ЩIалэгъуалэ правительствэм и лIыкIуэхэм – абы и унафэщI Къущхьэ Иналрэ узыншагъэр хъумэнымкIэ и министр КIэмпIу Зурианэрэ.

ЩIалэгъуалэ правительствэр – ар КъБР-м и Iэтащхьэм и деж щызэхэт щызэчэнджэщ, щызэпсалъэ органщ. Ар къыщIызэрагъэпэщам и щхьэусыгъуэ нэхъыщхьэр къэрал властым и органым къыпэщылъ къалэнхэр гъэзэщIэным щIалэгъуалэр къыхэшэнырщ, апхуэдэу иужькIэ къулыкъущIапIэхэм щылэжьэн IэщIагъэлIхэр гъэхьэзырынырщ.

ЗэIущIэм щытепсэлъыхьащ дохутыр IэщIагъэр къыхэзыха щIалэгъуалэр республикэм щекIуэкI медицинэ зэхыхьэхэм, узыншагъэр хъумэнымкIэ IэнатIэм къыпэщылъ къалэнхэр зэфIэхыным жыджэру къыхэша зэрыхъуным.

Министрым ЩIалэгъуалэ правительствэм и лIыкIуэхэр щыгъуазэ ищIащ гу-лъынтхуэ, лышх узыфэхэм япэщIэтынымкIэ, еIэзэнымкIэ щыIэ лъэпкъ проектхэр зэрагъэзащIэм, а Iуэхур ирагъэфIакIуэу адэкIи ирагъэкIуэкIыну лэжьыгъэхэр зыхуэдэм. Апхуэдэуи къыхагъэщащ лэжьыгъэ и пIалъэ фIыуэ зыщIэ дохутырхэр IэщIагъэлI ныбжьыщIэхэм щахуэзэ зэIущIэхэр къызэгъэпэщыным мыхьэнэшхуэ зэриIэр икIи абы и лъэныкъуэкIэ Iуэхугъуэ щхьэхуэхэр къыхалъхьащ.

ЛъэныкъуитIыр зэгурыIуащ Узыншагъэр хъумэнымкIэ министерствэмрэ медицинэ IэщIагъэр къыхэзыха ныбжьыщIэхэмрэ зэгъусэу зэхыхьэхэр ирагъэкIуэкIыну. Абы и пэщIэдзэу, зэман гъунэгъум къриубыдэу, Къалэбатэ Рустам ди республикэм щыщ щIалэгъуалэу Ставрополь дэт медицинэ къэрал университетым щеджэхэм яIущIэнущ икIи, къызэрыхигъэщамкIэ, абыхэм чэнджэщ яритынущ еджапIэ нэужьым къагъэзэжу къыщыхъуа щIыналъэм я Iэзагъэрэ зэфIэкIрэ къыщагъэсэбэпыну.

ЩХЬЭЩЭМЫЩI Изэ.