Жаз башында, жай кезиуде да жер-жерледе ёртенлени саны кёбейеди, от тюшер деген къоркъуу да бютюнда уллу болады. Кир-кипчикни, къауданны, кюйдюрюп туруу, тийишли жорукъланы сансыз этиу игиликге келтирлик тюйюлдю. Быллай хата-палахланы кёбюсюню сылтауу адамланы жууапсызлыгъындан чыгъады.

Бегирек да къоркъуулугъа уа сабанлада къургъакъ кырдыкны кюйдюрюуню санаргъа боллукъду. Бу жарсыу саулай къыралда окъуна энчи белгиленеди, кеси да дайым къайтарылып турады. Агъачлада ёртенлени сылтауу да асламысында ма олду. Аны къой, бир-бирледе от юйлеге жетеди, адам мюлкюне, табийгъатха да бек уллу хата салады.

Кёпле былай сагъыш этедиле: къауданны кюйдюрсек, аны семиртгичнича хайыры болады, иги тирлик алыргъа онг береди деп. Ол терс оюмду. Битимле адам улу жер башында чыкъгъынчы дери окъуна бек тап ёсюп тургъандыла, от салынырыгъын да излемей. Шёндю аны этгенле уа жерге хайыр келтирмейдиле, алай хауаны уа бек кирлендиредиле.

Дагъыда автомашина эмда темир жолланы, сора дагъыда путепроводланы жанларында от этерге, абери кюйдюрюрге чыртда жарамайды, аны да эсде тутугъуз. Бу жорукъну сансыз этгенле КоАП-ны 20.4 статьясыны биринчи кесегине тийишлиликде жууапха тартыллыкъдыла. Анга кёре гражданлагъа эсгертиу этип къояргъа боллукъдула неда 2-3 минг сом тазир саллыкъдыла. Бузукълукъ этген къуллукъчула – 6-15, энчи предпринимательле – 20-30, предприятияла бла организацияла уа – 150-200 мингишер сом тёлеуге къаллыкъдыла. Жамауат хайырланнган тийреледе, мюлкледе да (энчи бёлюнмеген жерледе) от этгенлени да жууаплылыкъ сакълайды. 

Омарланы Мурат хазырлагъанды.