Былтыр Къабарты-Малкъарда агропромышленность комплексде къармашханланы 1874 заявкасы дурус кёрюлгенди. Сёз мында субсидияла бла онгдурууну юсюнден барады, дегендиле регионну Эл мюлк министерствосунда.

Грантла бла субсидияла къоллу болгъанланы санында асламысы (1302) элчи-фермер мюлкледиле. Энтта да 325 заявканы уа эл мюлк организацияла бергендиле. Андан сора 203 энчи предпринимательни эмда башха категориялагъа кирген 44 хайырланыучуну ол жаны бла излемлерин жалчытхандыла.

Саулай айтханда, былтыр КъМР-де агропромышленность комплексни айнытыугъа 2,5 миллиарддан аслам сом жиберилгенди. Андан 2,4 миллиардын федерал бюджетден, къалгъан 120 миллион сомну уа республиканы бюджетинден бёлгендиле.

Ахча къоллу болгъанла аны битимчиликде бла малчылыкъда производствону айнытыугъа, алгъын алгъан инвестициялы кредитлерини бир кесегин жабаргъа боллукъдула. Финансланы бир кесеги гитче мюлклени эмда кооперативлени онгдуруугъа, сора дагъыда эл тийрелени айнытыугъа жиберилгенди.

Улбашланы Мурат хазырлагъанды.