КъБР-м и Парламентым и УнафэщI Егоровэ Татьянэ хабзэгъэув IэнатIэм и чэзу зэIущIэр вэсэмахуэ иригъэкIуэкIащ. 

Ар къыщызэIуихым, Егоровэ ­Татьянэ псом япэу къытеувыIащ ди къэралыр иджыпсту зэрыт щытыкIэм. «КъухьэпIэ къэралхэм Урысейм къы­хуагъэув санкцэхэм политикэ, экономикэ гугъуехьхэр къызэрашам, шэч хэмылъу, уегъэгузавэ. Абы щыгъуэми къыхэзгъэщыну сыхуейт ди къэралыр сыт щыгъуи адрейхэм къахэщу зэры­щыта зы щапхъэ: лъэпкъ куэду зэхэт ди цIыхубэр сыт хуэдэ гъэунэхуныгъэхэм ирихьэлIами, ар зэкъуэувэфу щытащ икIи арат, къапщтэмэ, ди зыужьыныгъэмрэ текIуэныгъэхэмрэ къы­­зыпэкIуэр. Сызэреплъращи, ноби псоми едгъэлъагъун хуейщ ди цIыху­бэр зэрызэкъуэтыр икIи зэрызэкъуа­мычыфынур. Ди блэкIам сыт щыгъуи пщIэ хуэтщIу дыкъэгъуэгурыкIуащ, апхуэдэ дыдэуи ноби дыкъызэримыкIуэтынум шэч къытесхьэркъым. Псоми къагурыгъэIуэн хуейщ Урысейм хьэлэбэлыкъ хэхуа цIыхухэр дэIэпы­къуэгъуншэу зэи къызэримыгъэнэнур. Дауи, псори дызыхуейр мамырыгъэращ, бэIутIэIуншэу дыпсэунырщ. Иджыпсту къекIуэкI Iуэхухэм ятеп­щIыхьмэ, ар къыщыдэхъулIэнур язы­ныкъуэ хамэ къэралхэм къабгъэдэкI Iуэхугъуэ шынагъуэхэм ди къэралыр щытхъума иужькIэщ». 
Iуэхугъуэ 18-м зэIущIэм щыхэплъащ. Депутатхэм зэдэарэзыуэ Iэ яIэтащ Налшык суд IуэхущIапIэ №6-м и зэзыгъэкIуж хеящIэу Лыджыдэ Аслъэн, Шэджэм суд IуэхущIапIэ №4-м и зэзыгъэкIуж хеящIэу СэвкIуий Аслъэн, Прохладнэ суд IуэхущIапIэ №4-м и зэзыгъэкIуж хеящIэу ХьэщIэ Алим, Тэрч районым и суд IуэхущIапIэ №1-м и зэзыгъэкIуж хеящIэу Хъущт Алимбэч, Бахъсэн районым и суд IуэхущIапIэ №1-м и зэзыгъэкIуж хеящIэу Щоджэн Замир, Аруан районым и суд Iуэху­щIапIэ №1-м и зэзыгъэкIуж хеящIэу Щоджэн Ислъам ягъэувыну къы­зэ­рагъэлъэгъуам теухуауэ.
ЗэIущIэм япэ еджэгъуэу къыщащтащ «Урысей Федерацэм и щIыналъэхэм я унафэщIхэм я лэжьыгъэр къызэрызэрагъэпэщ щIыкIэм теу­хуауэ» Федеральнэ законыр къызэращтам ипкъ иткIэ КъБР-м и Конституцэм зэхъуэкIыныгъэ халъхьэхэм ехьэ­лIауэ» КъБР-м и законым и проектыр. КъБР-м и Парламентым Законода­тельствэмрэ щIыпIэ унафэр зэрызэ­рахьэ IуэхухэмкIэ и комитетым и унафэщI Мэлбахъуэ Борис зэрыжи­IамкIэ, законопроектым къыщыгъэ­лъэ­гъуащ Къэ­бэрдей-Балъкъэрым и Iэтащхьэм, Парламентымрэ Прави­тельст­вэмрэ я пщэ­рылъхэр зыгъэбелджылы Iыхьэ­хэр. 
- Законопроектым щыдогъэбелджы­лы КъБР-м и Iэтащхьэр Федеральнэ законым тещIыхьауэ Парламентым и депутатхэм зэрыхах щIыкIэр. Къищы­нэмыщIауэ, щIыналъэ Iэтащхьэм еубзыху Къэбэрдей-Балъкъэр Республикэм и къэрал IуэхущIапIэхэм я лэ­жьэкIэмрэ Правительствэм и пщэ­рылъ­хэмрэ. Законопроектым къы­щы­-
хьащ зы цIыхур Къэбэрдей-Балъкъэ­рым и Iэтащхьэу хэхыгъуитI нэхърэ нэхъыбэ тетыну зэрыхуимытыр Конституцэм хэгъэ­кIыныр. Парламентым и депутатым и лэжьэкIэми зэхъуэ­кIы­ныгъэ егъуэт. Иджы ар хуитщ де­путат лэжьыгъэм къыдэкIуэу къэрал IэнатIи пэрытыну. Законопроектым къыщыгъэлъэгъуа адрей Iыхьэхэри хуэгъэзащ республикэм и Конституцэр егъэ­фIэкIуэным, - къыхигъэщащ Мэлба­хъуэм. 
КъБР-м Административнэ хабзэхэр къызэпамыудынымкIэ и кодексым и Iыхьэ 9.2-м халъхьэну къагъэлъагъуэ зэхъуэкIыныгъэхэр теухуащ муници­пальнэ районхэмрэ къалэ округхэмрэ къыщызэрагъэпэщ административнэ комиссэхэм жылагъуэ палатэм и лIыкIуэхэм ящыщ зэрыхагъэхьэнум. 
ЗэIущIэм япэ еджэгъуэу къыщащтащ «Къэбэрдей-Балъкъэр Республикэм и муниципальнэ IэнатIэхэм ятеу­хуауэ» КъБР-м и Законым зэхъуэкIыныгъэхэр хэлъхьэным и IуэхукIэ», «IуэхущIапIэхэм я мылъкум тральхьэ на­­ло­гым ехьэлIауэ» КъБР-м и Зако­нымрэ «Транспорт налогым теухуауэ» КъБР-м и Законым зэхъуэкIыныгъэхэр хэлъхьэнымрэ ехьэлIауэ, «КъэхъукъащIэ шынагъуэхэм цIыхумрэ щIыналъэмрэ щыхъумэным теухуауэ» ­КъБР-м и Законым и Iыхьэ 9-м зэ­хъуэкIыныгъэхэр хэлъхьэным теуху­а­уэ», «Къэбэрдей-Балъкъэр Республикэм и къа­лэ­хэм я ухуэкIэм теухуауэ» КъБР-м и Законым и Iыхьэ 10-м зэхъуэ­кIыныгъэхэр хэлъхьэным теухуауэ» ­КъБР-м и законхэм я проектхэр. 
КъБР-м и Парламентым ЕгъэджэныгъэмкIэ, щIэныгъэмрэ щIалэгъуалэм я IуэхухэмкIэ и комитетым и унафэщI Емуз Нинэ жиIащ ЩIалэгъуалэ палатэм хэкIыжыну хуейуэ Мэшыкъуэ Инал­рэ Кулиев Даниялрэ зыкъызэры­хуагъэзар, абыхэм я пIэкIэ цIыхуитI зэхьэзэхуэкIэ къызэрыхахынур.
Депутатхэр едэIуащ Урысей Федерацэм ЮстицэмкIэ и министерствэм и управленэу Къэбэрдей-Балъкъэрым щыIэм 2021 гъэм иригъэкIуэкIа лэжьыгъэм теухуауэ а IуэхущIапIэм и уна­фэщIым и къалэнхэр зыгъэзащIэ Кужонов Жантемыр жиIам.

БАГЪЭТЫР Луизэ.