Мазаем и 22-м, илъэс къэси хуэдэу, Хэкум и хъумакIуэм и махуэм ирихьэлIэу, Шау-Хун къурш щхьэдэхыпIэм цIыхухэр дэкIынущ.

ДэкIыныгъэм и пашэу щытынущ дунейпсо класс зиIэ къегъэлакIуэ, ЩIы хъурейм и бгы нэхъ лъагэ дыдэхэм дэкIа Аккаев Азнаур. ЗекIуэм хэтынущ Iэзагъ лъагэ зиIэ, бгым зыбжанэрэ щыIахэри япэу а Iуэхум пэрыхьэхэри. Гупым хагъэхьэнухэр къыщыхахкIэ, псом япэрауэ, еплъынущ пэщIэдзэ альпинист гъэсэныгъэ ябгъэдэлърэ бгым къыщагъэсэбэпыну щхьэзакъуэ Iэмэпсымэхэр яIэрэ. Ахэр щагъэгъуэзэнущ лъагъуэм и щытыкIэнумрэ бгы-мэзылъэ щIыпIэм зэрыкIуэцIрыкIыну Iэмалхэмрэ.

Мы гъэм щхьэдэхыпIэм дэкIыну гупыр бгым щыкIэрыхьэнущ Чаты уэх лъэныкъуэмкIэ, ищхъэрэ мэзылъэ джабэмкIэ. Шау-Хун щхьэдэхыпIэм и щыгум метр 2I53 лъагапIэм щагъэува Кавказым и хъумакIуэхэм я фэеплъ пхъэбгъум деж удз гъэгъахэр тралъхьэнурэ Хэкум и хъумакIуэхэм дакъикъэкIэ хуэщыгъуэнущ.

ЩхьэдэхыпIэм къехыжа нэужь дэкIыныгъэм хэтхэр Iухьэнущ Хэку зауэшхуэм хэкIуэда Хъущтэсырт къуажэдэсхэм я фэеплъ сыным деж.

Къэбэрдей-Балъкъэрым Курортхэмрэ туризмэмкIэ и министерствэмрэ республикэм АльпинизмэмкIэ, къуршым дэкIынымрэ спорт туризмэмкIэ и федерацэмрэ къабгъэдэкIыу зекIуэм хэтахэм дипломхэмрэ дэкIыныгъэм и сертификатрэ иратынущ.

ЗекIуэр къызэригъэпэщынущ «К вершинам» бгы клубым. Ар даIыгъынущ КъБР-м АльпинизмэмкIэ, къуршым дэкIынымрэ спорт туризмэмкIэ и федерацэм, Урысей Федерацэм и МЧС и лъагапIэ къэлъыхъуакIуэ-къегъэлъакIуэ гупу Iуащхьэмахуэ лъапэ щыIэм, КъБР-м и мафIэсгъэукIыфI-къегъэлакIуэ IуэщIапIэм, КъБР-м Курортхэмрэ туризмэмкIэ и министерствэм, «Альтаир» щIалэгъуалэ клубым.

Мэзкуу Къан.