Бу кюнледе Нальчик шахар округну жер-жерли администрациясында брифинг болгъанды. Ол Шалушкагъа кирген жерде "Северный" автовокзалны ачылыууна жораланнганды. Журналистлени сорууларына шахарны мэри Таймураз Ахохов бла КъМР-ни транспорт эмда жол мюлк министрини орунбасары Хадис Абазов жууаплагъандыла.
-Автовокзал ачылгъан биринчи кюнден окъуна социал сетьледе, жамауатны арасында да кёп тюрлю болмачы хапарла жюрюйдюле, бу тюбешиуню да ол хыйсапдан къурагъанбыз, - дегенди Таймураз Ахохов.
Ол шахарда битеу ишле да анда жашагъанлагъа тап болсун деген мурат бла этилгенлерин айырып айтханды. Сёз ючюн, алгъыннгы 2-чи номерли вокзал кетерилип, алайда машинала тыйгъычсыз жюрюрча этилликди, кенг жол ишленирикди. Алайда бирле кеслерине уллу мекям неда сатыу-алыу ара сюерикдиле, деген хапарла уа терсдиле, дегенди мэр.
Муниципалла аралы маршрутланы тюрлендириуню баш сылтауларын ангылата, Таймураз Борисович ала кёп болгъанларын, ол тизмеге шахар тийрелени экологиясы, къоркъуусузлукъну жалчытыу, терроризмге къажау мадарла окъуна киргенлерин айырып айтханды.
-Эски автовокзалны тийресинде 500 машина тохтай эди, - дегенди ол. - Ала уа, кесигиз ангылагъандан, бир-бирлерине, башхалагъа да уллу чырмаулукъ этгендиле. Террорчулукъдан сакъланыр онгла да бек аз эдиле. Республикабызны ара шахары машиналадан чыкъгъан уулу газ бла да бек кирленнгенди. Аны себепли, бу ишни башлардан алгъа, тюрлю-тюрлю оюмла сюзюлгендиле, ахырында бу оноугъа келгенбиз.
Кертиди, не жангы ишни да башласанг, чырмаула тюбемей къалмайдыла, заман бара-баргъанда, хар зат да кеси жерине келир, хайыры да ачыкъланыр,-деп чертгенди Таймураз Борисович.
Ол кёп маршрутла "Северныйге" дери баргъанларына, андан Нальчикни къайсы тийресине да адам чырмаусуз жетеригине да ышандыргъанды. «Биз маршрутланы барысын да тинтгенбиз да, Кенже эмда Больницала шахарчыкъ ары кирмей къалгъанын ачыкълагъанбыз. Ары да транспорт жиберликбиз»,- деп къошханды.
Автобусла уа жюрюрюкмюдюле, деген соруугъа Таймураз Ахохов былай жууаплагъанды: "Аны оноуу да этиле турады. Жууукъ заманлада жамауат къуру маршруткала бла угъай, автобусла бла да жюрюрча мадарла этилликдиле». Ол айтханнга кёре, Нальчикде жууукъ заманда "Северный" автовокзалны бла Къабарты-Малкъар къырал университетни эмда КъМКъАУ-ну араларында жангы автобус маршрут ачыллыкъды. Ол транспорт бла окъугъан жаш адамла студент билетлери бла хакъсыз жюрюрюкдюле.
Жол хакъны юсюнден айта, ол алгъынлай къаллыгъына ышандыргъанды. Муниципал транспорт бла баргъан адам жол хакъны банк карта бла тёлесе, ол 15 сом угъай, 13 сом боллугъун, "Мир" картаны хайырланса уа -10 сомгъа дери азайырыгъын да эсге салгъанды.
Сентябрь айда уа "Тройка" карта да кийирилликди. Аллай билет бла адам шахарны ичинде къаллай жамауат транспортда да жюрюрге эркинди, бир маршрутдан башхасына олтурургъа керек болса да, экинчи хакъ тёлемейди. Бусагъатда карталаны аллыкъ терминалла тохташдырыла турадыла.
Хадис Абазов а Пачев орамдагъы эски автовокзалгъа кюнню ичинде машинала 2500 кере келип чыкъгъанларын, ол зат а, ол тийрени кирлендиргенден сора да, бек тар этгенин айтханды. "Маршрутланы тюрлендиргенден сора, шабат эм ыйых кюнледе мен, иш этип, алайгъа барып, анда халгъа къарап тургъанма да, энди анда транспорт артыкъ кёп болмагъанына тюшюннгенме. Ары дери да кёп кере баргъанма ол тийреге. Алайда бир сюелсенг, хауаны осаллыгъын сезмей къалмагъанса",- деп белгилегенди министрни орунбасары.
Жангы автовокзалда террорчулукъдан сакъланырча не мадарла этилгенлерини юсюнден соруугъа жууап бере, Хадис Владимирович Идаров орамда автовокзалны юлгюге келтиргенди. Аны  тёгереги бегитилип, ичине кирген жерде энчи тинтген амалла орнатылгъандыла. Алагъа да адамла юйреннгендиле, аны ючюн бир тюрлю гурушхалыкъ чыкъмайды, дегенди.
"Северныйде" уа, ол айтханнга кёре, инвестор бийик качестволу жетмиш видеокамера орнатханды. Аланы бир къауумун "Къоркъуусуз республика" деген системагъа къошхандыла. Ол тийреге ётген транспортну бла адамланы къошакъ халда тинтиу амалла этиледиле деп, министерствону келечиси бу автовокзал битеу Шимал Кавказда, аны къой, саулай Россейде да эм игиледен бирине саналлыгъына ишексиз болгъанын чертгенди.
"Южный» автовокзалны юсюнден да соргъандыла журналистле. Хадис Владимирович анда да ишле къыстау баргъанларын, маршрутланы схемалары жаны бла келишимле этиле тургъанларын билдиргенди. Андан сора да, ол башха регионладан келген пассажир транспорт,алгъынча, Идаров орамдагъы автовокзалгъа келип тохтарыгъын, Лескен, Черек, Урван районладан келген гитче автобусланы уа кёп да бармай "Южный" алып башларыгъын айтханды.
Брифингни ахырында Таймураз Ахохов "Северныйге" кёчюу муниципал маршрутлагъа бла шахарчылагъа тап келлигине ышандыргъанды. "Айтханымча, къаллай жангычылыкъда да бирле жаратмагъан, артыкъ ангыламагъан затла боладыла, алай шахарны администрациясы республиканы Транспорт эмда жол мюлк министерствосу бла бирге битеу тюбеген чырмауланы бла кемчиликлени кетерир ючюн бар амалланы да хайырланырыкъды", -деп чертгенди.