Къабарты-Малкъар Республиканы Башчысы Казбек Коков Москвада РФ-ни Къырал советини Президиумуну кенгертилген жыйылыууна хазырланыу жаны бла семинар-кенгешге къатышханды. Тюбешиуге къошулгъанла Президентни администрациясыны таматасыны биринчи орунбасары Сергей Кириенко бла битеулю билим бериу бёлюмде регионланы алларында тургъан борчланы сюзгендиле. Баш спикерле РФ-ни жарыкъландырыу министри Сергей Кравцов, РФ-ни Президентини болушлукъчусу, РФ-ни Къырал советини секретары Игорь Левитин, РФ-ни Правительствосуну Председателини орунбасары Татьяна Голикова болгъандыла.
Иш башха-башха билим бериу ызлада алты къауумда бардырылгъанды. Къабарты-Малкъарны Башчысы республикада «къошакъ билим бериу эм сабийлени юйретиу» деген ызны туура этгенди. Ол бёлюмде онтёрт келечи ишлегенди, ол санда Севастопольну губернатору Михаил Развожаев, Тула областьныкъы – Алексей Дюмин, Курск областьныкъы – Роман Старовойт, Саратов областьныкъы – Валерий Радаев, Жаш тёлюню ишлери жаны бла федерал агентствону таматасы Ксения Разуваева, Москва бла Москва областьны билим бериу бёлюмюню келечилери. Жыйылыугъа къошулгъанла бу ызны айныууну юсюнден сёлешгендиле, регионлада жашауда бардырылгъан жетишимли сынамларын ачыкълагъандыла.
Къабарты-Малкъар Республиканы билим бериу системасында сабийлеге къошакъ билим берген 23 организация,  Сабий чыгъармачылыкъны «Кюн шахар» академиясыны къурамында къошакъ билим берген ара, «Кванториум» сабий технопарк, «Антарес» регион ара, элледе битеулю билим берген организациялада 69 «Точка роста» билим бериу арала, Нальчик шахар округну 33-чю номерли школуну мурдорунда «IT-клуб» цифралы айнытыу ара, 123 школ спорт клуб, аладан 82-си федерал реестрге къошулупдула, жумушларын тындырадыла.
Къошакъ билим бериуде фахмулу сабийлени ачыкълау эм ёсдюрюу бек магъаналыды. «Сириус» билим бериу ара оператору болгъан фахмулу сабийлени къырал информация ресурсунда Къабарты-Малкъардан 624 школчу эсепдедиле, ала Битеуроссей эришиулени алчылары эм призёрлары болгъан сабийледиле. Пансион низамда ишлеген Сабий чыгъармачылыкъны «Кюн шахар» академиясыны къурамында болгъан фахмулу сабийлени лицейинде толусунлай къырал ырысхыгъа 2020-2021 жылда КъМР-ни 104 шахарындан бла элинден 269 школчу окъуйдула. 2021 жылда 18 лицейчи школчуланы Битеуроссей олимпиадаларыны регион урумуну алчылары болгъандыла, 3-сю – «Большая перемена» эм «Большие вызовы» Битеуроссей конкурсланы.
Школчуланы, фахмулу жаш тёлюню эм устазланы кёллендирирча шартладан бири Къабарты-Малкъар Республиканы Башчысы школчуланы Битеуроссей олимпиадаларында хорлагъанлагъа, аланы устазларына эм жаш алимлеге 2021 жылда биринчи кере къурагъан премиялары боллукъду. 2021 жылда аны 5 жаш алим, 53 устаз эм 55 школчу аллыкъдыла.
РФ-ни Къырал советини кенгертилген жыйылыуунда жыйымдыкъ докладха семинар-кенгешни эсеплерине кёре предложенияла кийирилликдиле.