Кёп болмай КъМР-ни Промышленность, энергетика эмда сатыу-алыу министерствосуну келечилери Бахсанда Россейни аскерчилерине тюрлю-тюрлю кийимле тикген «ВоенТекстильПром» предприятияда болгъандыла, деп билдириледи ведомствону прессслужбасындан.
«ВоенТекстильПром» – жангы технологияланы хайырланнган, социал эм экономика жаны бла да магъаналы предприятияды. Аны бёлюмлери Нальчикде эм Залукокоажеде да бардыла. Алада 600 аслам адам къармашады. Бахсанда бёлюмюнде бюгюнлюкде 80 ишчи урунады, келир заманда аланы санын 250 инсаннга жетдирирге мурат барды.
Компанияны бёлюмюню таматасы Алим Кунашев айтханнга кёре, ишчиле, иги иш хакъдан сора да, толу социал пакет бла жалчытылынадыла. Ол санда хакъсыз ашхана ишлейди, медицина страхование этиледи эмда башха къыйматлы амалла хайырланыладыла.
- Предприятияда жангы оборудованияла бла технологияла хайырланыладыла эм иш кёллю, сынамлы кадрла урунадыла. Ол себепден продукцияны качествосу бла бирге производство да ёсе барады. Коронавирус кенг жайылгъан кезиуде цехледе маскала эмда башха абериле тикгендиле. Мында да ол кесин айырмалы кёргюзтгенди. Саулай алып айтханда, предприятие женгил промышленностьда кесини жерин тапханды дерге боллукъду,- дейди КъМР-ни промышленность, энергетика эм сатыу-алыу министрини орунбасары Эльдар Кяров.