КъБР-м и Iэтащхьэ КIуэкIуэ Казбек жэп­уэгъуэм и 25-м мэкъумэш IэнатIэм епха IуэхущIапIэхэр къызэхикIухьащ.
Прохладнэ щIыналъэм щыIэ «Овощи Юга» компанием и лэжьакIуэхэм ар яхуэзащ, апхуэдэуи IуэхущIапIэм и лэжьэкIэр зригъэлъэгъуащ. Зы илъэсым томат пIас­тэу тонн 15 къыщIэзыгъэкI заводыр 2016 гъэм яухуащ. НобэкIэ ар дунейпсо мардэм изагъэ IэмэпсымэхэмкIэ къызэгъэпэщащ икIи зы илъэсым банкI мелуани 100 къыщIегъэкI. 2020 гъэм блэкIа и мазибгъум банкI мелуан 80 игъэхьэзыращ, ар тонн мин 12 мэхъу.
«Овощи Юга» компанием мыIэрысэми елэжьын нэгъабэ щIидзащ. 2021 гъэм инвестицэ проектыр къигъэсэбэпу IуэхущIапIэм и мурадщ зы илъэсым тонн мин 24-рэ къыщIигъэкIыну. Ар къехъулIэу щытмэ, лэ­жьапIэ IэнатIэу иджыри 70 къызэригъэ­пэщыфынущ.
Мы Iуэхум нэхъыщхьэу хэлъхэм ящыщщ нэгъуэщI къэралхэм кърашхэр ди деж къы­щыщIагъэкIхэмкIэ зэхъуэкIа зэрыхъур. Ды­зэрыт зэманым ящэ томат пIастэхэм я процент 80-р хамэ щIыпIэхэм кърашауэ аращ. Прохладнэ дэт заводым къыщIигъэкIыр фIагъ лъагэ зиIэ ерыскъыщ икIи ди къэралым щIэупщIэ щызиIэщ, уасэкIи щынэхъ пудщ.