КъБР-м и Парламентым и УнафэщI Егоровэ Татьянэ иджыблагъэ иригъэкIуэкIащ зи чэзу зэIущIэр. Абы къыщаIэта Iуэхугъуэ нэхъыщхьэхэм ящыщщ «Экология» лъэпкъ проектыр Къэбэрдей-Балъкъэр Республикэм зэрыщагъэзащIэр.
КъБР-м щIыуэпс хъугъуэфIыгъуэхэмрэ экологиемкIэ и министр Шаваев Ильяс жиIащ «Экология» лъэпкъ проектым хыхьэу республикэм «Къэрал къабзэ», «Мэзхэр хъумэн» Iуэхухэм зэрыщелэжьыр.
«Къэрал къабзэ» федеральнэ Iуэхум къыщыгъэлъэгъуахэр гъэзэщIэным хухахащ сом мелуан 86,75-рэ. Абы щыщу сом мелуани 6,07-р щIыналъэм и мылъкущ. Ахъшэр хухахащ хабзэм къемызэгъыу иракIута кIэрыхубжьэрыхухэр зэран зыхуэхъуа щIы Iыхьэхэр ягъэпшэрынымрэ ягъэбэтэжынымрэ. Апхуэдэ лэжьыгъэхэр щрагъэкIуэкIащ Май, Тэрч щIыналъэхэмрэ Бахъсэн къалэ округымрэ зэхэту я щIы гектар 20-м щIигъум.
Министрыр щхьэхуэу тепсэлъыхьащ «Мэзхэр хъумэн» федеральнэ Iуэхум хыхьэу иужьрей илъэситIым зэфIагъэкIам. Абы зэрыжиIамкIэ, щIы гектар 97-рэ къызэщIиубыдэу мэзым жыгыщIэхэр щыхасащ, щIы гектар 1285-м жыгхэр зыхуей щыхуагъэзащ. 2019 гъэм зэфIагъэкIа лэжьыгъэ псоми сом мелуан 72-рэ текIуэдащ, мэзхэм зрагъэубгъуным сом мелуани 6,99-рэ хухахащ, мэзым пыщIа IуэхущIапIэхэр зыхуэныкъуэ Iэмэпсымэхэмрэ мафIэсгъэункIыфI техникэхэмкIэ къызэрагъэпэщыным - сом мелуан 65,01-рэ.
МафIэсгъэункIыфI техникэу 30, Iэмэпсымэ зэмылIэужьыгъуэу 55-рэ (сом мелуан 64,3-рэ текIуэдащ), мэз хозяйствэм къыщагъэсэбэп оборудованэу 6 (сом мин 692,8-рэ и уасэу) къащэхуащ.
Шаваевым къыхигъэщащ республикэм апхуэдэ мафIэсгъэункIыфI техникэ бжыгъэ илъэс куэд хъуауэ республикэм къызэрымыкIуар.
2020 гъэми лэжьыгъэшхуэ ирагъэкIуэкIащ «Мэзхэр хъумэн» Iуэхум ипкъ иткIэ. Мы илъэсым ахэр зэфIагъэкIащ сом мелуан 43,58-кIэ. Мэзхэм зегъэужьыным сом мелуани 8-м щIигъу хухахащ, техникэ щхьэхуэхэр къэщэхуным - сом мелуан 34,74-рэ. Техникэ хьэлъэу (бульдозеррэ жыжьэ кIуэцIрыкIыф машинэу) 11 къащэхуащ, Iэмэпсымэу 90-м хуэдиз.
Къэпсэлъам зэрыжиIамкIэ, «Къэрал къабзэ» федеральнэ проектыр ягъэзэщIэн папщIэ, IуэхущIапIэм Урысейм ЩIыуэпсыр хъумэнымкIэ и министерствэм зыхуигъэзащ федеральнэ бюджетым къыхэкIыу щIыналъэм субсидие къритын папщIэ.
Апхуэдэу 2021 - 2023 гъэхэм я мурадщ Былым къуажэм щIы гектари 3,6-рэ щагъэпшэрыну, Тырныауз къалэм кIэрыхубжьэрыхухэмкIэ щауцIэпIа щIы гектари 3,2-рэ ягъэкъабзэу зрагъэужьыжыну.
- МэзгъэфIэну 4-рэ щIыуэпсым щыгъуэтыгъуей щIыпIи 6-рэ кадастр учётым дгъэуващ. ФIыщIэ яхудощI КъБР-м и Парламентым и депутатхэм, абы и лъэныкъуэкIэ къызэрыддэIэпыкъуам папщIэ. Дыщогугъ 2021 гъэм и кIэ пщIондэ мыхьэнэ зиIэ щIыпIэхэр псори дэфтэрхэм къыщыдгъэлъэгъуэну, - къыхигъэщащ Шаваевым.
Депутатхэр щIэупщIащ хабзэм къемызэгъыу мэзхэм жыгхэр зэрыщраупщIыкIым ахэр зэрыпэщIэтым, КъБР-м и мылылъэхэр зэрыткIум теухуауэ щIэныгъэлIхэм ирагъэкIуэкI къэхутэныгъэхэм, кIэрыхубжьэрыхухэр зэрагъэсеижымрэ зэрызэхадзымрэ, нэгъуэщIхэми.
Шаваевым жиIащ мэзхэр хабзэм къемызэгъыу зэрыраупщIыкIым сыт хуэдэ щIыналъэри зэрыIууэр, ауэ Къэбэрдей-Балъкъэрым апхуэдэ гугъуехьыр зэрыщынэхъ мащIэр. ЩIыналъэм и мэзхэм къызэщIаубыдэр щIы гектар 194700-рэ къудейщ, абы щыщу гектар 8800-р щхьэхуэу яхъумэ, абы къыхэкIыу апхуэдэ щIэпхъаджагъэ ялэжьыныр щымащIэ дыдэщ. Министерствэм и IэщIагъэлIхэм щIэх-щIэхыурэ щIыпIэхэм зыщаплъыхь, хабзэхъумэ IэнатIэхэм я лэжьакIуэхэр я гъусэу мэзыр хъумэным я нэIэ трагъэтщ. КъищынэмыщIауэ, IуэхущIапIитIым я лIыкIуэхэр зыхэт къэпщытакIуэхэр хахащи, 2020 гъэм ирагъэкIуэкIа рейдхэм я бжыгъэм хэпщIыкIыу хэхъуащ, я лэжьыгъэм кърикIуэри нэрылъагъущ: илъэсыр къызэрихьэрэ уголовнэ Iуэху 17 къаIэтащ хабзэм къемызэгъыу мэзым жыгхэр зэрыщраупщIыкIам теухуауэ, апхуэдэуи лэжьакIуи 6 я IэнатIэм IуагъэкIащ мэзым кIэлъыплъынымрэ хъумэнымрэ теухуауэ я къалэныр тэмэму зэрамыгъэзэщIам къыхэкIыу.
Къэпсэлъам къыхигъэщащ псыежэххэм я Iуфэхэр зэгъэпэщыжынымрэ нэхъ шынагъуэ зыпылъ псыIущIэхэм елэжьынымрэ 2020 гъэм и кIэм зэрызэфIагъэкIынур.
Егоровэ Татьянэ жиIащ щIыуэпсыр хъумэныр Iуэхугъуэ нэхъыщхьэхэм зэращыщыр икIи абы пщIэ хуащIу сабийхэр къэгъэхъуным ахэр цIыкIу щIыкIэ гулъытэ хуэщIын зэрыхуейр. ЗэIущIэм щыжаIар къызэщIакъуэжа нэужь, щхьэж и къалэныр яубзыхуащ. Псом хуэмыдэу къыхагъэщащ «Экология» Iуэхур республикэм зэрыщагъэзащIэм, кIэрыхубжьэрыхухэр зыхуей зэрыхуагъазэм адэкIи нэхъ ткIийуэ зэрыкIэлъыплъыпхъэр.