Москвада ВДНХ-ны тийресинде 10 октябрьден башлап ол айны 13-сюне дери Россейни агропромышленностуну «Алтын кюз-2018» деген 20-чы юбилей кёрмючю бардырылгъанды. Ол кеси да профессионал байрамгъа – Эл мюлкде бла жарашдырыучу промышленностьда ишлегенлени кюнюне жораланнганды.
Анга Къабарты-Малкъар да тири къатышханды. Бизни келечилерибизни къауумуна КъМР-ни Башчысыны къуллугъун болжаллы халда толтургъан Казбек Коков башчылыкъ этгенди. Делегациябызгъа уа Россей Федерацияны Президентинде Къабарты-Малкъар Республиканы Дайым келечиси Ратмир Бекишев, КъМР-ни Башчысыны федерал къырал власть органла эмда Москваны Правительствосу бла байламлыкъла къурау жаны бла энчи келечиси Геннадий Губин, КъМР-ни Правительствосуну Председателини биринчи орунбасары – Къабарты-Малкъарны эл мюлк министри Сергей Говоров, КъМР-ни экономиканы айнытыу министрини орунбасары Ольга Белецкая, республиканы эл мюлк министрини орунбасары Мачраил Шетов, Россейни терек бахчачыларыны ассоциациясыны Шимал-Кавказ регионда вице-президенти, «Инвест-Бизнес» агрофирманы баш директору Альберт Каздохов, «Нальчикский» халыуа завод» акционер обществону баш директору Мухамед Кудалиев, «Прохладное» ОАО-ну къурагъан Хасан Дешев, «Фрукт-Трейд» ООО-ну баш директору Асланби Балов, «Отбор» инновациялы-производство агрофирманы таматасы Князланы Расул, «Зольскени картофу» ООО-ну баш директору Руслан Бжеников, Чегем муниципал районну администрациясыны башчысы Артур Текушев, тау жерледе бла тау этекледе терек бахчачылыкъны Шимал-Кавказ илму-излем институтуну директору Владимир Бербеков, В.М.Коков атлы Къабарты-Малкъар аграр университетни ректору Аслан Апажев, Эл мюлкню Къабарты-Малкъар илму-излем институтуну директору Магомед Жекамухов, республиканы белгили агрофирмаларыны топ-менеджерлери киргендиле.
Къабарты-Малкъарны агропромышленный комплекси продукциясыны 100 тюрлюсюн кёргюзтгенди эмда жыйырмадан артыкъ илму жангычылыкъла бла шагъырей этгенди. Кёрмючню къурагъанла, анга къатышханла, къонакъгъа келгенле да республиканы эл мюлкюню бла жарашдырыучу промышленностуну продукциясыны кёп тюрлюлюгюне, урлукъчулукъ жаны бла жангы амалларына да бийик багъа бергендиле. Анга уа Къабарты-Малкъарны аграрийлерини бла алимлерини тюрлю-тюрлю даражалы 20 чакълы майдалгъа бла дипломлагъа тийишли болгъанлары шагъатлыкъ этеди.
Россейни белгили компанияларыны КъМР-ни АПК-сыны продукцияларына уллу эс бургъанларын энчи белгилерчады. Россей Федерацияны, узакъ эмда жууукъ тыш къыралланы да эл мюлк товарла, аш-азыкъ рыноклада ишлеген оноучула, топ-менеджерле да Къабарты-Малкъарда ёсдюрюлген эмда чыгъарылгъан битимлени, консерва продукцияны, нартюх урлукъну, тууар эм тауукъ этни, сютден жарашдырылгъан затланы, гара сууланы, томат пастаны алыуну юсюнден узакъ болжаллы келишимле этерге хазыр болгъанларын билдиргендиле.
Россейни Саха (Якутия), Алтай край, Тула область, Пермь край дегенча регионлары, Уралны, Сибирьни, Узакъ Востокну да талай субъекти Къабарты-Малкъарны агропромышленный комплексибизни продукциясына энчи кёзден къарагъандыла. «Кабардинка» къырал академия ансамблини уста тепсеучюлерин а «Алтын кюз-2018» деген кёрмючге келгенлени барысын да тамашалыкъгъа къалдыргъандыла.
