Тюнене Къабарты-Малкъарны Башчысыны къуллугъун болжаллы халда толтургъан Казбек Коков Республикалы кадиология арада болгъанды, анда жюреклеге бла къан тамырлагъа операцияла этген, аллай аурууланы да тинтиу бла кюрешген А.Н.Бакулев атлы араны баш илму къуллукъчусу бла тюбешгенди. Профессор Ольга Бокерия республикабызгъа иш бла келип турады.
А.Н.Бакулев атлы араны специалистлери 2017 жылны ноябринден бери 1500 чакълы бир саусузгъа къарагъандыла. Ара шахарны клиникасында андан ары тинтирге эмда багъаргъа деп 400-ден аслам адам айырылгъанды.
Регионда багъыуну бийик технология амаллары сингдирилгенлерини хайырындан жюреклери, къан тамырлары ауруп ёлгенлени саны азая барады.
Казбек Коков Ольга Бокериягъа, жюреклеге бла къан тамырланы операцияла этген А.Н.Бакулев атлы араны башчыларына Къабарты-Малкъарны адамларына тынгылы кардиология болушлукъ этиуню къураугъа тири къатышханлары ючюн жюрек ыразылыгъын билдиргенди.