УФ-м ЗыхъумэжыныгъэмкIэ, ЕгъэджэныгъэмкIэ, ЩIэныгъэмкIэ и министерствэхэм, Урысей зауэ-тхыдэ жылагъуэ зэгухьэныгъэм, «ТекIуэныгъэм и волонтёрхэр» зэщIэхъееныгъэм, Ветеранхэм я урысейпсо зэгухьэныгъэм къыхалъхьауэ, илъэс етIуанэ хъуауэ ди къэралым щрагъэкIуэкI «ТекIуэныгъэм и диктант» дунейпсо акцэр. Мыгъэрей Iуэхур ирагъэхьэлIэ 2020 гъэр Фэеплъымрэ ЩIыхьымрэ я илъэсу зэрагъэувам. Ар екIуэкIынущ фокIадэм и 3-м.
Диктантыр къызэгъэпэщыным икIи ди хэкум и щIыналъэ псоми щегъэкIуэкIыным и мурад нэхъыщхьэр ТекIуэныгъэ Иным и пщIэр жылагъуэм нэхъри къыщыIэтынырщ, совет зауэлIхэм Хэку зауэшхуэм щызэрахьа лIыгъэм и щапхъэм къытщIэхъуэ щIэблэр щIэпIыкIынырщ, ди къэралым и щхьэхуитыныгъэм, цIыхубэ мамырыгъэм зи псэр щIэзытахэм я фэеплъ нэхур хъумэнырщ. КъызэгъэпэщакIуэхэм зэрыжаIэмкIэ, мыгъэрей Iуэхум хэтыну гукъыдэж зыщIа цIыхухэм я бжыгъэр куэдкIэ нэхъыбэщ, нэгъабэрейм еплъытмэ (гъэ кIуам диктантыр ятхащ цIыху мини 150-м щIигъум). НобэкIэ акцэм хэтыну гукъыдэж зыщIахэр мини 100 зыбжанэм нэсащ.
Апхуэдэу хэхъуэнущ диктантыр щатхыну щIыпIэхэм я бжыгъэми. Нэгъабэ апхуэдэ щIыпIэхэр 1373-рэ хъууэ щытамэ, мы гъэм къызэIуахынущ диктантыр щатхыфыну утыку 7500-рэ. Ахэр къыщызэрагъэпэщынущ цIыху мини 5 нэхърэ мынэхъ мащIэ зыщыпсэу жылэ къэс. Акцэм онлайн щIыкIэм тетуи ухэтыфынущ.
Ди хэкум хыхьэ щIыналъэ псори, апхуэдэу хамэ къэрал 75-рэ (ТекIуэныгъэ Иныр къызэрахьрэ блэкIа илъэс бжыгъэм хуэкIуэу) зыхэтыну диктантым упщIэу 25-рэ хэтынущ. Абыхэм ящыщу 5-р щIыналъэхэм я тхыдэм ехьэлIауэ зэхагъэуващ. Лэжьыгъэр зыгъэхьэзырахэм ящыщщ Урысей къэрал гуманитар университетым и IэщIагъэлIхэр.
«ТекIуэныгъэм и диктантыр» зытхыну хуейхэм а фIэщыгъэ дыдэр зиIэ сайтым зыщрагъэтх хъунущ. Лэжьыгъэр зыгъэзэщIа дэтхэнэми «ТекIуэныгъэм и диктант» электрон дипломыр къыхуагъэхьынущ. Абы щытекIуахэм я дэфтэрхэр сэбэп къахуэхъунущ еджапIэ нэхъыщхьэхэм щыщIэтIысхьэкIэ.