Республикэ сабий клиникэ сымаджэщым узыфэр къыщахутэ и къудамэм МРТ аппаратыщIэр щагъэувыну пэшыр ягъэхьэзыр.
Iуэхур зэрекIуэкIыр къипщытащ КъБР-м узыншагъэр хъумэнымкIэ и министр Къалэбатэ Рустам. Министрымрэ Республикэ сабий клиникэ сымаджэщым и дохутыр нэхъыщхьэ Гущэл Людмилэрэ тепсэлъыхьащ зэман гъунэгъухэм къриубыдэу IуэхущIапIэм игъуэтыну зыужьыныгъэхэм, ахэр къызэрызэрагъэпэщынум теухуа еплъыкIэ щхьэхуэхэр къагъэлъэгъуащ.
Сом мелуан 77-рэ зи уасэ МРТ-р министерствэм къищэхуащ «Узыншагъэр хъумэн» лъэпкъ проектым хэту. ЩIэуэ къаIэрыхьа иджырей медицинэ IэмэпсымэщIэм Iэмал къаритынущ сабий сымаджэщым узыфэр къэхутэнымкIэ щрагъэкIуэкI къэпщытэныгъэхэр нэхъ псынщIэу зэфIагъэкIынымкIи абыхэм я фIагъыр къэIэтынымкIи.
НэхъапэкIэ Республикэ сабий клиникэ сымаджэщым лъэпкъ проектым хэту къыIэрыхьауэ щытащ компьютер томографрэ нэ узыфэхэм зэреIэзэ Iэмэпсымэрэ.