25 сентября, 2018 - 08:29
РФ-ни Къырал Думасы «Единая Россия» партияны депутатлары хазырлагъан законопроектни биринчи окъулууда къабыл кёргенди. Анда сёз сюдню оноуу бла коррупциячыладан, улутхачыладан сыйырылгъан ахчаны Россейни Пенсия фондуна бериуню юсюнден барады.
Бу предложенияны быйыл 20 августда партияны Генеральный советини бла «Единая Россияны» фракцияларыны таматаларыны совети бирге бардыргъан кенгешде партияны Генсоветини башчысы, Федерация Советни вице-спикери Андрей Турчак этген эди. «Коррупциячыланы, улутхачыланы ахчалары, аладан сыйырылгъан ырысхы да тюзюнлей Пенсия фондха берилирине къаты болургъа борчлубуз», -деген эди ол кенгешден сора.
Алай бла законопроект биринчи окъулууда къабыл кёрюлгенди. Анда РФ-ни Пенсия фондуну бюджетин толтурургъа жарагъан жерлени тизмеси кенгертиледи. Ол санда коррупция, улутхачылыкъ бла байламлы аманлыкъла этгенледен сыйырылгъан ахчаны, аланы ырысхыларын сатхандан тюшген файдаланы да фондха берирге кереклиси белгиленипди. Ызы бла ол страховой пенсиялагъа къоратыллыкъды. 2019-2024 жыллада бу ахчаны ёлчеми 1,8 миллиард сомгъа жетериги белгиленеди. Документ кючюне келир жыл 1 январьдан кирирге боллукъду.
«Единая Россия» партияны фракциясыны башчысыны орунбасары Андрей Исаевни айтханына кёре, проект къабыл кёрюлгени бла Бюджет кодексге тюзетиуле кийирилликдиле. «Анда коррупция, улутхачылыкъ бла байламлы аманлыкъла этгенледен сыйырылгъан ахчаны РФ-ни Пенсия фондуна бериллиги, ахча страховой пенсияланы тёлеуге къоратыллыгъы жазыллыкъды»,-дегенди ол.
«Единая Россия» партияны пресс-службасы.