Бюгюн, 4 апрельде, Къабарты-Малкъарда от тюшюуге къажау служба къуралгъанлы 190 жыл толады. Бу кюнде 1834 жылда Къабарты ызны башчысы полковник Пирятинский Къабартыда бла Малкъарда аскерчи къалалада от тюшюуге къажау «Ачыкъ жорукъланы» къабыл кёргенди. Ма ол узакъ кюнде башланнганды республикада жамауатны, халкъ мюлкню да от тюшюуледен сакълауну тарыхы.

Андан бери озгъан жыллада службаны аты, ведомстволу иелиги да бир ненча кере алышыннганды. Бюгюнлюкде уа КъМР-де бу жууаплы ишни РФ-ни МЧС-ини КъМР-де Баш управлениясыны 1-чи от тюшюуге къажау-къутхарыу отряды эмда Къабарты-Малкъарны От тюшюуге къажау-къутхарыу службасы толтурадыла. Республикалы ведомствогъа  2018 жылдан бери таматалыкъны   Анзор Карданов этеди.
Къабарты-Малкъарны От тюшюуге къажау-къутхарыу службасы от тюшюуге къажау мадарланы бардырыргъа, халкъны къоркъуусузлукъ жаны бла билимин кючлерге, излеу ишлени толтурургъа, авариялада ачыгъанланы къутхарыргъа, жууаплы къуллукъчуланы бла халкъны инсанланы къоруулау жорукълагъа юйретирге борчлу болгъанын айтырчады.  
Ахыр жыллада уа ырысхы-техниканы кючлеуге, от ёчюлтюучюлени билимлерин игилендириуге уллу эс бурулгъанын айтырчады. Республиканы оноучуларыны болушлукълары бла службагъа тийишли техника, къутхарыу ишлени бардыргъанда керекли оборудование да берилгендиле. От ёчюлтюучюлени кийимлери дайым да жангыртылгъанлай тургъанларын айтыргъа сюеме. Энтта бир иги шарт – Терк районда Ново-Хамидие элде жангы бёлюм да ачылгъанды (12-чи номерли).
Бюгюнлюкде республиканы от тюшюуге къажау службасы техника жаны бла кереклисича жалчытылыныпды. Аны хайырындан а от тюшюулени болдурмау, аланы ёчюлтюу, авариялада ачыгъанланы, тюрлю-тюрлю къыйын болумлагъа тюшгенлени къутхарыу ишни бийик даражада толтурургъа онг чыкъгъанды.  
От ёчюлтюучюлени шёндюгю тёлюсю жашауларыны 30 жылдан да асламын халкъны сакълаугъа жоралагъан тамата нёгерлери салгъан тёрелеге кертичилей къаладыла. Бу къысха статьяда уа ведомствону аягъы юсюне болуууна себеплик этгенлени бир къауумуну атларын сагъыныргъа тийишли кёреме, аланы арасында Борис Абазовну, Вячеслав Алексеенкону, Атабийланы Кязимни, Сергей Бардошну, Адмир Берхамовну, Анатолий эм Артур Бжениковланы, Бёзюланы Магомедни, Гергъокъланы Ахматны, Арсен Гошоковну, Аслан Гуковну, Руслан Колоевни, Алик Огурлуевни, Геннадий Портянченкону, Галина Романованы, Заур Табуховну, Султан Татаркановну, Слава Хагуровну, Елена Черникованы, Амир Шибзуховну, Геннадий Шимни, Асланби Шокуевни, Шунгарланы Хусейнни эм кёп башхаланы.     
Регионда тамамланнган профилактика мадарла, от ёчюлтюучюлени билимлери, сынаулары от тюшюу бла байламлы жарсыуланы, алада ачыгъанланы санын иги да азайтыргъа себеплик этгендиле. Сакъланнган мюлкню багъасы уа миллиард сомдан да асламды. 

Арсен Сабанов,
Къабарты-Малкъарны От тюшюуге къажау-къутхарыу службасыны къуллукъчусу