Жыл сайын, къыш бла жаз айырылгъан кюн, 21 мартда поэзияны кюнюн саулай дунияда белгилейдиле. Ол кюн хар тилде, хар миллетде да назмула окъуйдула, сёзню кючюне бла магъанасына хурмет этедиле.

«Горянка» газетни баш редактору Зарина Канукова «Чегетде окъуула» деген проектни къурагъанлы 6 жыл болады. Быйыл ол Тырныауузну 1-чи номерли лицейини маданият миллет майданында ётгенди. Анга лицейни окъуучулары къатышхандыла. Поэзия байрамны лицейни китапханасыны таматасы Геккиланы Люаза, малкъар тилден устазы Ахматланы Люба бла таматасыны юйретиу иши жаны бла орунбасары Жашууланы Марина къурагъандыла.

Къонакъла къоншу республикаладан бла Къабарты-Малкъардан эдиле. Бизден да Россейни Жазыучуларыны союзуну члени, назмучу Ахматланы Люба къатышханды. Лицейчиле Эфендиланы Джамиля, Жашууланы Элина, Мырзоланы Самира, Этезланы Камилла, Милана Машезова, Алана Мурзабекова, Рузанна Шаова, Дарина Калмыкова малкъар, орус, къабарты тилледе да окъугъан назмулары келген къонакъланы сейир этдиргендиле.

Ана тиллеринде ариу сёлешалгъанлары къууандыргъанды. Поэзияны байрамында назмуладан сора да, Ахматланы Любаны сёзлерине къуралгъан ариу жырланы Байсолтанланы Инара да айтханды. Мында «Кёлюм, жаным да поэзиядан толудула» деген китап кёрмюч къуралгъанды. Хар сабий да кеси сезимлерин окъугъанчыгъармаларыны шатыклыгъы бла ачыкълагъанды.

Бу тюбешиуню бизни окъуучуларыбызгъа къаллай магъанасы болгъаныны юсюнден а устазла билдиргендиле.

Ахматланы Люба:

- Мени оюмума кёре, бу проектни магъанасы уллуду. Хар жылдан жангы поэтле къатышадыла. Танымагъан, бу кюннге дери билинмеген фахмулу поэтле бла танышыр онг болады. Быйыл бизге Абхазиядан келгенлени кеслерини тиллеринде окъугъан тизгинлерине сюйюп тынгылагъанбыз. Мени да Абхазиягъа чакъырып, чыгъармачылыгъыма аталгъан ингир къураргъа сюйгенлери бек хычыуун кёрюннгенди.

Дагъыда назмуларымы абхаз тилге кёчюргенлери уа къууандыргъанды. Поэтни назмулары окъулгъан къадарда, ол сауду. Хар сабий да сюйюп тынгылай эдиле ангыламагъан тиллериндеги назмулагъа. Ол а, маданиятны ариулугъун, не къадар магъаналы болгъанын, быллай тюбешиулени кереклилигин кёргюзтеди. Поэзияны миллети жокъду. Не тилде окъулсала да чыгъармала, аланы шатыклыгъы, макъамы назмуну магъанасын тилни билмегенлеге окъуна ангылатады.

Геккиланы Люаза:

- Сабийлерибиз не заманда да назмуланы ариу окъугъанларын биле эдим. Алай бюгюн, аллай бир сезим къайнай эди сабийлени жюреклеринде назму айта туруп. Туура жан салгъанча, магъанасын жашап, ёз дунияларын хапарлагъанча айталырла деп, билмей эдим. Аны себепли бек къууаннганма. Бу байрамны ёсе келген тёлюбюзге магъанасы уллуду. Къуру поэзиягъа сюймеклик угъай, мында намыс, адет, бизни хар кюнден алагъа берирге кюрешген ариу къылыкъларыбыз да барды. Къонакъла залгъа кирип, жерлерине барысы да олтургъунчу, окъуучуларыбыз сюелип тургъандыла. Ол тюйюлмюдю жетишим? Юйретиу ишибизни тюз бардыргъаныбыз къууандырады.

Сёз ючюн, Этезланы Камилла назмусун айта туруп, жиляп къалгъанында, къонакъла да мудахсыннгандыла. Чыгъарма бла сабий аланы жюреклерине жеталгъаны шарт кёрюннгенди.

Сабийлерибиз ариу къылыкълыла болуп, адабиятха сюймекликде ёсгенлери ючюн бек ыразыма. Хар бири да бу байрамдан халаллыкъ, бир бирге къайгъырыу, жарыкъ умутла алып кетгендиле юйлерине. Дерследен тышында къуралгъан хар иш да окъуучуларыбызны кеси араларында байламлыкъларын, шуёхлукъларын да ёсдюреди.

Темуккуланы Асият хазырлагъанды.