Нальчикде Головко атлы 1-чи номерли сабий поликлиникада «Саулукъ сакълау» миллет проектни биринчи болушлукъ берген бёлюмню жангыртыу» программасына кёре бюгюннгю излемлеге кёре болушлукъ тапдырылырча мадар этилгенди. Сёз уллулугъу 1600 квадрат метрге жетген юч къатлы жангы корпусну юсюнден барады. Анда педиатрланы бла башха врачланы кабинетлери, биринчи болушлукъ берген эм саулукъларын кючлерча бёлюмле бардыла. 

Бюгюнлюкде бу багъыу махкемеде эсепде 63 минг адам барды. Энди ол бир кезиуге 500 саусузгъа къарарчады. Ол санда кюндюз жатханлагъа 14 ундурукъ барды. 

 Поликлиниканы тышы эм ичи да омакъ болгъандыла.  Аны бла бирге ол бюгюннгю излемлеге келишген «аяулу» амал бла ишлейди. Кезиулерин сакълагъан адамла бир жерде бек басынмазча, аурууларына кёре юлешинирча, жукъдурургъа къоркъуулула энчи бокслада сакъларча, врачха электрон халда жазылырча, керек кабинетни терк табарча эм башха онгла къуралгъандыла. Аны бла бирге мекямны арбазы да айбатландырылгъанды.

Миллет проектге кёре, медицина организациягъа, бийик класслы жангы диагностика оборудование, саусузгъа юйюнде биринчи медицина болушлукъ тапдырырча санитар автотранспорт да алыннганды.