2024 гъэр унагъуэм, абы къыдекIуэкI лъапIэныгъэхэр хъумэным я илъэсщ. Мэлбахъуэ Тимборэ и цIэр зезыхьэ Лъэпкъ къэрал библиотекэм мы илъэсыр зэрагъэлъэпIэну выставкэхэр, зэIущIэхэр, зэпеуэхэр яубзыхуащ. Абыхэм язщ иджыблагъэ абы къыщызэрагъэпэща «Институт семьи: традиции и семейные ценности» зэхыхьэ щхьэпэр. Абы ирагъэблэгъащ къэрал, жылагъуэ, дин IуэхущIапIэхэм я лIыкIуэхэр.
Библиотекэм ирегъэкIуэкI унагъуэхэр тхылъым дегъэхьэхыным, унагъуэхэм я Iуэху зэIумыбзхэр зэхэгъэкIынымкIэ егъэджакIуэхэмрэ психологхэмрэ ядэIэпыкъуным ятеухуа лэжьыгъэшхуэ. А Iуэхугъуэхэм тепсэлъыхьащ Лъэпкъ библиотекэм и щIэныгъэлI секретарь Подрезовэ Ольгэрэ IуэхущIапIэм и хъыбарегъащIэ къудамэм и унафэщI Сэрахъэ Таисэрэ.
«Галактика» IуэхущIапIэм и унафэщI Шыбзыхъуэ Залым къытеувыIащ иджырей зэманым унагъуэхэр зрихьэлIэ Iуэху зэIумыбзхэм, Iэмэпсымэхэм зэрызаужьрэ цIыхухэм я гупсысэкIэми зэхущытыкIэми зэхъуэкIыныгъэхэр къызэрыщыхъуам гу зэрылъыптэм.
- ЦIыху гупысэкIэм хуабжьу зихъуэжащ. Абы зыужьыныгъи шынагъуи къыдокIуэ. Псом хуэмыдэу адэ-анэхэм зыхуагъэхьэзырын хуейщ зэманыщIэм зэрыхэпсэукIынумрэ я сабийхэр зэрагъэсэнумрэ. НэгъуэщIхэм я Iуэху еплъыкIэхэмрэ абыхэм пэжу къалъытэмрэ зытедгъэхуэну дызэрыхэтыр зыщыдгъэгъупщапхъэщ, - жиIащ Шыбзыхъуэ Залым.
КъБР-м щIалэгъуалэм я IуэхухэмкIэ и министрым и къуэдзэ Ахъмэт Артур жиIащ цIыхум и хьэл-щэнхэр къызыхэкIа унагъуэм къанэ щымыIэу зэрелъытар. «Трансформация семей в постсоветский период» и лэжьыгъэм къыщиIуатэ и Iуэху еплъыкIэхэм щигъэгъуэзащ зэIущIэм хэтахэр. Абы къыхигъэщащ лъэпкъ щэнхабзэмрэ бзэмрэ щахъумэ унагъуэхэр нэхъ зэрынасыпыфIэр, апхуэдэхэм къыщыхъу сабийхэм ягурэ я щхьэрэ зэрызэтелъыр. Ахъмэт Артур и гуапэу жиIащ «Щапхъэу къалъыта унагъуэщIэ» зэпеуэр министерствэм мы гъэм етIуанэу зэрыригъэкIуэкIынур, «Унагъуэ зыгъэпсэхугъуэхэр» Iуэхур зэраублэжынур.
Протоерей Бобылев Валентин зэхуэсахэм ягу къигъэкIыжащ совет зэманым мащIэу зэрыщытар зэщхьэгъусэ зэбгъэдэкIыжхэр. Унагъуэ лъапIэныгъэхэр иджыпсту дуней псом нэхъ къыщытIэсхъами, ди къэралым ис лъэпкъхэм ижь-ижьыж лъандэрэ унагъуэм теухуа хабзэхэр яхъумэну яужь зэритыр узыгъэгуфIэу, узыгъэгушхуэу къилъытащ абы. Сабийхэр лъагъуныгъэм щIэпIыкIын, адэ-анэмрэ адэшхуэ-анэшхуэмрэ я нэIэм щIэтын зэрыхуейри къыхигъэщащ. НэгъуэщI Iэмал щыIэкъым щIэблэ ирибгъэсэну.
КъБР-м ис муслъымэнхэм я жылагъуэ зэгухьэныгъэм и унафэщIым и дэIэпыкъуэгъу Амщыкъуэ Анджелэ жиIащ унагъуэм и къалэн нэхъыщхьэр - цIыху щыпкъэ гъэсэныр - нэхъ пасэм адэшхуэ-анэшхуэм я пщэрылъу зэрыщытар, а зэпыщIэныгъэр иджы нэхъ махэ зэрыхъуар.
Налшык къалэм щыпсэу ЦIыхубзхэм я жылагъуэ зэгухьэныгъэм и унафэщI Дыджэш Лидэ лъэпкъ хабзэхэр хъумэным мыхьэнэшхуэ зэриIэр къыхигъэщу жиIащ къэралым ит ахъшэр къаIэрыхьэн папщIэ зэщхьэгъусэ куэдым я нэчыхьыр зэракъутэжыр къемызэгъыу къызэрилъытэр.
«АпхуэдэпцI зылъагъу сабийхэр нобэ я адэ-анэм доплъей, пщэдей езыхэми пцIы яIэщIэкIынущ. Дгъэлъагъуэ щапхъэри гъэсэныгъэм щыщщ», - жиIащ Дыджэшым.
Подрезовэ Ольгэрэ Сэрахъэ Таисэрэ я хьэщIэхэм фIыщIэ хуащIри, библиотекэм дяпэкIи щрагъэкIуэкIыну зэхыхьэхэм хэтыну ирагъэблэгъащ.
ТЕКIУЖЬ Заретэ.
