Сыт хуэдэ зэманми дахуэныкъуэщ ухуакIуэ IэпщIэлъапщIэхэм, электрикхэм, гъущI зэпызыгъавэхэм, пхъащIэхэм, нэгъуэщIхэми. Илъэс 40 хъуауэ апхуэдэ IэщIагъэлIхэр зыгъэхьэзыр «Строитель» колледжым унафэщIу трагъэуващ Къурмэн Мурат. Колледжыр нэхъри егъэфIэкIуэным, абы къыщIигъэкI IэщIагъэлIхэр лэжьыгъэ IэнатIэкIэ къызэгъэпэщыным, езы IуэхущIапIэр Iэмэпсымэрэ техникэкIэ зыхуей хуэгъэзэным теухуауэ Къурмэным мурадыфIхэр иIэщ.

Ухуэныгъэм и мардэхэм щыхурагъаджэу республикэм щыIэр а зы еджапIэрщ. Колледжым щIотIысхьэ ебгъуанэ классым къыщIэкIхэри, класс пщыкIуз къэзыухахэри. IуэхущIапIэхэр, автомобиль гъуэгухэр, аэродромхэр электрическэ станцхэр ухуэным, информацэ системэхэр зэтегъэпсыхьыным, автомобиль зэмылIэужьыгъуэхэр щIыжыным, гъущIым, абджым, пхъэм елэжьыным щыхуагъасэ абы. Колледжым хэту мэлажьэ щIэныгъэм щыхагъахъуэ курсхэр. Ахэр лIэужьыгъуэ 35-м ноблагъэ.

 - Ди студентхэр республикэм и IуэхущIапIэхэм практикэ догъакIуэ, зэгурыIуэныгъэ етщIылIэурэ. Куэдыр практикэ здэкIуэ IуэхущIапIэхэм лэжьыгъэ IэнатIэ щыпэроувэж, - жеIэ еджапIэм и унафэщIым.

Колледжым къыщызэрагъэпэщ хабзэщ Iуэхугъуэ зэхуэмыдэхэр. ЕгъэджакIуэхэр республикэм и школхэм кIуэурэ абыхэм щеджэхэм IуощIэ, щапхъэхэр ирагъэлъагъу. Езы ныбжьыщIэхэри кIуэурэ колледжым и лъэщапIэхэм щекIуэкIхэм кIэлъоплъ, загъасэ. ЕджапIэм щIэх-щIэхыурэ щрагъэкIуэкI дерс зэIухахэр, зэпеуэ зэмылIэужьыгъуэхэр. Абы спорт секцэхэр хэтщ, спортзал, стадионхэр яIэщ. Куэд щIакъым еджапIэм «Пэрытхэм я жэрдэм» зэгухьэныгъэм и къудамэ къызэрыщызэIуахрэ.

Илъэм къэс колледжым къызэрегъэпэщ «Профессионалы» республикэ чемпионатыр. Абы я IэпщIэлъэпщIагъэр къыщагъэлъагъуэ республикэм щыIэ колледжхэм щеджэхэм.

Колледжыр нэхъри ефIэкIуэным теухуауэ абы и унафэщIым мурадыфIхэр иIэщ.

- Илъэс къэс лъэпкъ проектхэр йокIуэкI. Проектым ухыхьэрэ упхыкIыфмэ, абы къыпэкIуэ мылъкумкIэ еджапIэр зыхуей пхухуэгъэзэнущ. Студентхэм щIэныгъи зэрагъэгъуэтынущ, загъэсэнущ, ахъшэ гуэри къалэжьыну Iэмал яIэнущ. Ди мурадщ лъэпкъ проектым дыхыхьэу ди зэфIэкI къэдгъэлъэгъуэну, къыдэхъулIэмэ, абы къыпэкIуэ мылъкумкIэ еджапIэр нэхъри едгъэфIэкIуэну, - жеIэ Мурат.

IэнатIэ зыпэрыувам и гугъу щищIкIэ, Къурмэн Мурат къыхегъэщ:

Мы колледжым си япэкIэ унафэщIу тетам лэжьыгъэшхуэ ирищIылIащ еджапIэм зригъэужьыным, абы и пщIэр къиIэтыным. Абы къызэригъэпэщам хэслъхьэнIауэ, япэкIэ згъэкIуэтэну къысхуагъэфэщауэ аращи, зыри згъэщIэхъу хъунукъым.

ГУГЪУЭТ Заремэ.