«Россей» халкъла аралы кёрмючде ётген Предпринимательствону  кюнюнде Къабарты-Малкъардан он предприниматель тематика мастер-классла бардыргъандыла, деп билдиргендиле республикада «Мени бизнесим» арадан.

Бизнесни къайсы тюрлюсю да магъаналы болгъанын кёргюзтгендиле ала. «Hatsibana» ат бла юс кийимле чыгъарыу бла кюрешген Фатима Шогенова быстырны юсюнде халы бла тигип, абериле жарашдырыргъа юйретгенди, ювелир Юрий Маргушев а миллет халда жюзюклени къалай жарашдырыргъа боллугъун кёргюзтгенди.

«Madina Saral’p» араны башчысы Мадина Саральп, мастер-классында миллет юс кийимле бла шагъырейлендиргенди, 11- жыллыкъ уста Турбина София уа, «Тигинтон» предприятияны башчысы Залина Нагаплова бла бирге, ариу ийис этген жау чыракъла этерге юйретгендиле.

«Техноканикулла» эмда «Робототехникадан «RoboIT сабий курсла» проектлени башчысыны – Ирина Азубекованы мастер-классына къатышханла роботланы къалай ишлетирге боллугъун кёргендиле, «Paper Exclusive» проектни къурагъан Наталья Горностаева уа къагъытдан открыткала жарашдырыргъа юйретгенди.

«Munira» деген чыгъармачылыкъ мастерскойну таматасы Жолабланы Мунира агъачдан къол бла абериле этиуню энчиликлерин кёргюзтгенди, «Создание инновационных решений» ООО-ну башчысы Хаупшев Ислам а къонакъланы COR Technologies продукциясы бла шагъырейлендиргенди.

Къабарты-Малкъарны стендинде уа бирле таулу макъамлагъа тепсегенле, къабарты жырланы жырлагъанла да чыгъып, къараучуланы кёллерин алгъандыла. «Бу стендни къаты бла бош алай озуп кеталлыкъ тюйюлсе!» - дей эдиле къонакъла.

Аны къатына ол кюн РФ-ни Правительствосуну Председателини биринчи орунбасары Андрей Белоусов да келген эди. Къонакълагъа республикада предприятияланы продукцияларын юлешгендиле, саугъала да бергендиле. «Къуру къол бла бири да кетмегенди. Бек кёп къонакъ бар эди. Бирлери мастер-класслагъа къатышыргъа сюйюп келгендиле, башхалары жырлагъа тынгыларгъа, тепсеулеге къараргъа. Сабийлеге окъуна сейир эди», - дегендиле «Мени бизнесим» араны келечилери.

Улбашланы Мурат хазырлагъанды.