Къулий Къайсын  атлы  Малкъар  къырал театрны жаш актёрлары Москвада окъугъанларында юйреннгенлерин алгъаракълада  къараучулагъа кёргюзтгендиле. Ол кюн аланы иоюнларына къарагъанла театргъа, циркге да бир жолгъа келгенча болгъан эдиле. Бу жаш адамла кёп тюрлю жанрла жаны бла фахмулудула.

Театр оюнну бардыргъанла Жаппуланы Марат бла Жашууланы Мухаммат хар сахнагъа чыгъарыкъны, къараучула аны кесин кёргюнчю, шагъырей этип къоя  эдиле.

Байтуугъанланы Света  художестволу  гимнастикадача обруч бла тепсегенине ким да бюсюрерча эди. Таулу къызла спортну бу тюрлюсю бла кюрешселе, бир кишиден артха къаллыкъ тюйюлдюле.

 Байдаланы Шахим Элвис Преслини сыфатын тап кёргюзталды. Залда къарангыдан чыгъып къалгъан актёрмуду  огъесе жырчы кесимиди дегенча болгъан эдиле  оюннга къараргъа келгенле.

Глашланы Алихан кёргюзген фокуслагъа да сюйюп къарарча эди. Андан сора бу оюннга Гогуйланы Арафат да къатышханды.

 Быллай оюнла (капустникле) керекдиле,  жаш тёлюню бюгюннгю жашаууну юсюнден таулу авторлада  пьеса жазып, фахмулу жашла бла къызла анда ойнасала къалай иги боллукъ эди.

Мамайланы Алий.