Тэрч щIыналъэм и администрацэм и унафэщIым и къалэнхэр пIалъэкIэ зыгъэзащIэ Хъущт Аслъэнбий иджыблагъэ лэжьыгъэ IуэхукIэ щыIащ Курп Ищхъэрэм (Къаншыуей) икIи щыгъуазэ зищIащ иджырей мардэм тету зэрагъэпэщыжу къызэIуахыжа  курыт еджапIэм и Iуэху зыIутым, зригъэщIащ школыр иджыпсту зыхуэныкъуэмрэ ехьэкIыпIэ имыIэу зэлэжьыпхъэхэмрэ.

         Къаншыуей и курыт еджапIэр зэгъэпэщыжыным ехьэлIа лэжьыгъэхэр ирагъэкIуэкIащ егъэджэныгъэр егъэфIэкIуэнымкIэ щыIэ къэрал лъэпкъ пэхуэщIэм хыхьэу икIи абы трагъэкIуэдащ сом мелуани 102-рэ.

Тэрч щIыналъэм и унафэщIыр илъэгъуахэмкIэ арэзы хъуащ, сыту жыпIэмэ, школым япэм иIэ теплъэмрэ нобэ игъуэтамрэ икъукIэ зэщхьэщокI, дауи фIы и лъэныкъуэкIэ.

Школым ику иту метр зэбгъузэнатIэу мини 5-м нэблагъэ еубыд, щIыунэхэри хэбгъэхьэмэ. 2000 гъэм щегъэжьауэ абы и ещанэ къатыр къагъэсэбэпакъым, сабийхэм уащыдэлэжьэныр мышынагъуэншэу къалъытэри ягъэбыдауэ щытащ. Иджы ныкъусаныгъэ псори ягъэзэкIуэжащ. Школым и лъабжьэр ягъэбыдащ, унащхьэр, щIыхьэпIэбжэхэр, кIуэцIыбжэхэр, щхьэгъубжэхэр, лъэгур, инженер сетхэр къанэ щымыIэу зэрахъуэкIащ.

ЗэхъуэкIыныгъэфIхэр ягъуэтащ школым и пэш кIуэцIхэми – еджапIэ пэшхэр, спорт, актовэ залхэр, дэкIуеипIэхэр, пырхъуэхэр зыхуей хуагъэзащ, унэлъащIэхэмкIэ, егъэджэныгъэм къыщагъэсэбэп IэмэпсымэхэмкIэ, компьютер техникэхэмкIэ ахэр къызэрагъэпэщащ. 

ШхапIэмрэ пщэфIапIэмрэ щхьэкIэ обрудованэщIэхэри къащэхуащ. Сабийхэм Iэмал ягъуэтащ Iэхуитлъэхуит хъуа пэшышхуэхэм ерыскъы пщтырхэр щашхыну. Абы нэмыщI, гулъытэншэу къагъэнакъым щIыунэхэри – ахэри зыхуэныкъуэ щымыIэу къращIыкIащ.

Къуажэм и сабий садыр жьы зэрыхъуам къыхэкIыу, унафэ щыIат ар школым къагъэIэпхъуэу, цIыкIухэми абы хэщIапIэ щыхуащIынуи, ари зрагъэхъулIащ. Псалъэм къыдэкIуэу, ахэр зыщIэхуэн пэшхэр къыгуащIыхьащ, зыхуей-зыхуэфIхэмкIэ къызэрагъэпэщащ. Сабийхэм щакIэлъыплъ блокым щIыхьэпIэ щхьэхуэ хуащIын мурад щыIэщ. МафIэсымрэ терроризмэмрэ щахъумэн папщIэ зэлэжьыпхъэхэри зэфIагъэкIащ.

А псом къадэкIуэу, школым и хъуреягъкIэ иджырей уэздыгъэхэмкIэ къызэщIагъэблащ. Япэм абы къекIуэкIыу щыта пкъо 15-м щыщу тIу-щым фIэкIа лампIхэр фIэмылъамэ, иджы абыхэм псоми ток кIапсэхэр ирашэлIащ.

НобэкIэ зэлэжьыпхъэу къэнар школым къедза щIыпIэр зыхуей хуэгъэзэнырщ, къэкIыгъэхэр хэсэнырщ, сабийхэм зыщагъэпсэхун щIыпIэхэр къыхэгъэщхьэхукIынырщ. Хъущт Аслъэнбий школым и унафэщIхэм абыхэм ехьэлIауэ унафэ яхуищIащ, тэмэму егупсысу щIыпIэр зыхуей хуагъэзэну. Апхуэдэ Iэмалхэр къат школыр автомобиль гъуэгум зэрыпэжыжьэм, абы и фIыгъэкIи, цIыкIухэм я шынагъуэншагъэр къызэгъэпэща зэрыхъум. Сабийхэр щыджэгун, спорт площадкэхэр щыбухуэн  щIыпIэхэр щыIэщ.

                                                        ХЬЭЩЫКЪУЕЙ Олег.