Тамаша табийгъаты, берекет жери болгъан, къонакъбай адамла жашагъан Зольск район жюзжыллыкъ байрамын белгилегенди. Залукокоажени Маданият юйюнде юбилейге жоралап уллу байрам къурагъандыла. Районну къууанчы бла алгъышларгъа кёп белгили инсанла келгендиле.
Жыйылыуну аллында барысы да ёрге сюелип Россей Федерацияны, Къабарты-Малкъар Республиканы да гимнлерине тынгылагъандыла. Ызы бла байрамны бардыргъан Евгений Енин бла Фатима Чехмахова поэтесса Инна Кашежеваны журтуна жораланнган тизгинлерин окъуп, къонакъланы алгъышлагъандыла, Зольск районну тарыхы бла да шагъырейлендиргендиле.
Къабарты-Малкъарны область толтуруучу комитетини президиумуну буйругъу бла 1924 жылда 23 февральда Нагорный округ къуралгъан эди. Аны санына Малка, Залукокоаже, Зольское, Каменномост, Сармаково, Хабаз, Хасаут, Псынадаха, Приречное, Баптист хуторла (Совхозное), дагъыда Зольск бла Нагорный къошланы жерлери кирген эдиле. 1931 жылгъа дери уа районну административ арасы Пятигорск (ол округну къурамына кирмегенди) болуп тургъанды. 1937 жылда районну Малкинский деп алай белгилегендиле, 1938 жылда уа аны Зольский район этгендиле, арасы да Зольское элде болгъанды.
Районну администрациясыны башчысы Руслан Хашимович Гятов къонакълагъа тюбешиуге келгенлери ючюн ыразылыгъын айтханды. Сора районну юсюнден жарашдырылгъан «Живи и здравствуй Зольская земля!» деген видеороликни кёргюзтгендиле.
Ызы бла КъМР-ни Башчысы Казбек Коковха сёз бергендиле.
- Багъалы жамауат, барыгъызны да бу жарыкъ байрам бла алгъышлайма. Бу дата дагъыда Ата журтну къоруулаучусуну кюню бла байламлыды. Аны себепли эр кишилени да алгъышлайма. Райондан кёп атлары айтылгъан жигитле, жазыучула, алимле чыкъгъандыла. Ата журт урушха мындан кёп инсан кеслерини ыразылыкълары бла кетип, жанларын, къанларын аямагъандыла. Аланы хар бирини да аты эсибиздеди, ала ёсюп келген тёлюлеге чынтты юлгюдюле. Бюгюн да жашларыбыз туугъан журтларына сакъдыла, аланы кёбюсю кеслери ыразылыкълары бла энчи аскер операциядадыла. Аланы барысын да энчи алгъышлайма, аллай жигит жашланы ёсдюрген аталагъа бла аналагъа ыспас этеме, жюрек ыразылыгъымы билдиреме, юйюрлерине сау-саламат, хорлам бла жыйышырларын тежейме, - дегенди Казбек Валерьевич.
Бюгюннге дери да районну айныууна уллу эс бурулгъанын да айтханды республиканы оноучусу. «Мындан ары да кёп магъаналы ишле бардырыллыкъдыла. Зольск районну табийгъаты ариу болгъаны баямды. Тышындан келген къонакъла да мында саулукъларына хайырлы солуу жерле болгъанларын айтадыла. Аны себепли туризмни мындан ары айныууна уллу эс бурургъа керекбиз. Зольск районда адамланы къонакъбайлыкъларына республикада угъай, битеу Россейде да ыспас этедиле. Адетге, намысха, маданият байлыкъгъа уллу эс бургъанлары ючюн мен да энчи ыразылыгъымы билдиреме. Район а мындан ары да айныгъанлай, жашнагъанлай турсун»,- дегенди Казбек Коков.
Ызы бла КъМР-ни Башчысыны указы бла районну айныууна уллу къыйын салгъан Кючменланы Музафарны жашы Малик, Хазратали Хажкасимов, Светлана Кушхова, Фатимат Хуранова белгиленнгендиле, Казбек Валерьевич аланы сыйлы грамотала, «Зольск районнга 100 жыл» деген майдал бла да саугъалагъанды.
КъМР-ни Парламентини Председатели Татьяна Егорова да келгенлени эки байрам бла да алгъышлагъанды.
- Белгилисича, Зольск район республиканы чегинде турады, келген къонакъла да биринчи бу районнга тюшедиле, аны себепли ол республиканы бетин ачыкълайды. Кесибизни адамларыбыз а, узакъдан келе, Зольск районнга жетселе, юйлерине киргенлерин ангылап, жюреклери къууанады. Барыгъызны да байрам бла алгъышлайма, районну эки жюз жылы да къууанч бла жетсин, тарыхда жангыз да ахшы болумла бла белгиленсин»,- дегенди Татьяна Борисовна.
Ызы бла ол КъМР-ни Парламентини буйругъу бла кёп жылланы жетишимли ишлегенлери ючюн районну айныууна себеплик этген Приречное элни абаданларыны биригиуюню келечиси Акъбайланы Солтанны бла Кичибалыкъны орта школуну малкъар тилден бла адабиятдан устазы Болатланы Розаны сыйлы грамотала бла, «Зольск районнга 100 жыл» деген майдал бла саугъалагъанды.
Юбилей бла алгъышлагъанланы санында КъМР-де Адамны эркинликлери жаны бла уполномоченный Зумакъулланы Борис да болгъанды. 1962 жылда комсомолну обкомуну секретары болуп, биринчи командировка бла Зольск районнга келгенин да сагъыннганды. «Эрттен автобус бла бери келип, райкомну мекямыны къатына жетгенимде, аны эшигинде «нартюхдеме» деп жазылып тура эди, экинчи эшикде да алай. Ишчи адамла, ала бири да ишден къачмагъандыла, урунуулары бла республиканы, районну да атын иги бла айтдырып тургъанларын а энчи белгилерчады. Ызы бла райкомну биринчи секретарына барама, алайда ишге тебирей тургъан Муса Ильясович Докшоковха тюбеп, ким болгъанымы айтама. Ол битеу комсомолла нартюхде ишлей тургъанларын айтады да, аны биргесине ары барама. Алай бла мен да бир ыйыкъны ала бла нартюхде ишлеп тургъан эдим. Аны себепли мен да районну айныууна къыйын салгъанма»,- дегенди Борис Мустафаевич. Бу райондан урунууну жигитлери кёп болгъанын сагъынып, мындан арысында да жаш тёлю аллай абаданладан юлгю алгъанлай турурларын тежегенди. Зумакъул улу Зольск районну адамларын алгъышлап, алагъа саугъала, сыйлы грамотала да бергенди.
Андан сора РФ-ни Къырал Думасыны депутаты Геккиланы Заургъа сёз бергендиле. Ол да районда жашагъанланы бу жарыкъ юбилей бла алгъышлагъанды. Районнга таматалыкъ этген Руслан Хашимовичге ыразылыгъын айтханды. Ол районну хар элини айныууна уллу эс бургъанын энчи чертип, мындан ары да кёп ахшы проектлени жашауда бардырырын тежегенди. Саулукъ сакълауда бла маданиятда ишлегенлеге Сочиде солурча путёвкала бергенди.
Юбилейде жылы сёзлерин айтыргъа сахнагъа республиканы башха районларыны эм шахар администрацияларыны таматалары бла келечилери Таймураз Ахохов, Валерий Ажиев, Вячеслав Архангельский, Артур Балкизов, Юрий Борсов, Андрей Журавлев, Сафарби Инжижоков, Къулбайланы Алан, Хачим Мамхегов, Татьяна Саенко, Сотталаны Къурман, Асланби Хуштов да чыкъгъандыла.
Черек районну администрациясыны таматасы Къулбайланы Алан Черек бла Зольск районла 2012 жылдан бери бир бирге билеклик этип, байламлыкъ жюрютгенлей тургъанларын айтханды. Быллай байламлыкъ ёмюрле бла бардырылып турлугъуна ышаннганын да чертгенди.
Жюз жылны ичинде бу райондан дуниягъа белгили спортчула, алимле да чыкъгъанларын белгилеп, мындан ары да районну, республиканы да атын айтдыргъан инсанлары кёбейгенлей турсун, деп алгъышлагъанды. Жюзжыллыкъ юбилейге уа таматала районнга керекли оргтехника бергендиле. Дагъыда Алан Борисович таулу къол устала хазырлагъан кийизни музейлерине саугъалагъанды. Руслан Хашимовичге да ыразылыгъын айтып, ол миллет байлыкъгъа уллу эс бургъанын чертип, анга энчи саугъа бергенди.
Байрамда жылы сёзлерин айтханла аслам блгъандыла, ала барысы да районнга тынчлыкъ, монглукъ тежегендиле. Дагъыда сыйлы грамотала, майдалла бла районну айныууна къыйынлары кирген адамланы белгилегендиле, аланы санында Кичибалыкъдан Ёлмезланы Мустафаны жашы Магомед, Замира Калова, Хасан Махотлов, Александр Колот, Лилия Карданова, Хабазны орта школуну малкъар тилден бла адабиятдан устазы Уяналаны Гульнара, дагъыда эллени администрацияларыны башчылары да болгъандыла.
Ызы бла къонакъланы аламат композициялары бла белгили жырчыларыбыз къууандыргъандыла. Алим Кодзоков а энчи аскер операцияда болгъан жашларыбызгъа аталгъан «Степная птица» деген жыр бла, анга жарашдырылгъан видеоклип бла да шагъырей этгенди келгенлени. Жыйылыуну ахырында «Родная Зольская земля» деген жыр адамланы кёллерин жарытханды.
Темуккуланы Амина.
