Ди къэралым и къалащхьэм иджыблагъэ щекIуэкIащ пауэрлифтингымкIэ дунейпсо зэхьэзэхуэ, «ЩIымахуэ Мэзкуу» фIащауэ. Абы хэтащ Урысейм и спортсмен 300-м нэблагъэ.
КърикIуахэр зэхалъхьэжа нэужь, зэпеуэм и абсолютнэ чемпион цIэр къыфIащащ Къэбэрдей-Балъкъэрым и лIыкIуэ Вэрокъуэ СулътIан. IэпщэкIэ абы къиIэта килограмм 92,5-рэ зи хьэлъагъ штангэм и хьэрхуэрэгъухэр пэлъэщакъым икIи дунейпсо классымкIэ спортым и мастер цIэр къыхуагъэфэщащ.
Ди щIалэр зыгъасэр Хьэщпакъ Мусарэ Гъубж БетIалрэщ.
Ашэмэз и гупым дыкъыхегъащIэ
Гъэ джэгугъуэщIэм зыхуэзыгъэхьэзыр ди «Спартак-Налшыкым» къыкIэлъыкIуэ зэныбжьэгъугъэ зэIущIэр Кисловодск къалэм щыIэу «Динамо-Ставрополь» командэм дригъэкIуэкIащ мазаем и 20-м.
Ди жагъуэ зэрыхъущи, налшыкдэсхэм мыбыхэми ятекIуэн яхузэфIэкIакъым. Махуищ-плIы ипэкIэ ингушхэм я «Ангушт»-м бжыгъэр 0:1-уэ дыкъыхигъэщIат.
Иужьрей зэпеуэм и япэ Iыхьэр иухащ бжыгъэр 2:1-уэ датекIуэу. Ди щIалэхэм къахэжаныкIар Гъуэгузокъуэмрэ Хьэшырымрэщ. Джэгум и етIуанэ Iыхьэм Ставрополь и командэм топитI ди гъуэм къыдигъэкIащ икIи 3:2-уэ къыттекIуащ.
Къыхэдгъэщынщи, ди хьэрхуэрэгъухэм яхэту налшыкдэсхэм къапэщIэтащ ДыщэкIыр, Мэкъуауэр, Мэшыкъуэр, Дэхъур. Фызэрыщыгъуазэщи, «Динамо-Ставрополь»-м и тренер нэхъыщхьэр Шакъ Ашэмэзщ икIи командэм и унафэщI зэрыхъурэ мыр и япэ текIуэныгъэщ.
«Спартак-Налшыкым» а махуэм топджэгу губгъуэм къригъэхьащ Каркаевыр, Далиевыр, Къардэныр, КIэдыкIуейр, Березовыр, Торосян, ХьэцIыкIур, Жангуразовыр, Хьэшырыр, ЛIупыр, Селяевыр.
Иджы, мазаем и 25-м, Кисловодск щыIэу налшыкдэсхэр IущIэнущ Шэшэным и «Ахъмат» клубым и щIалэгъуалэ командэм.
Мыдрейуэ, тренер нэхъыщхьэ иджыри къэс зимыIэ ди щIалэхэм гукъанэ зэкIэ яхуэтщI хъунуи къыщIэкIынкъым.
ХЬЭЩЫКЪУЕЙ Олег.