Нальчикде СКФО-да Монополиягъа къажау службаны (ФАС) бёлюмюнде Жамауат советлени семинар-жыйылыулары болгъанды, анга республикалы власть органланы, прокуратураны, жамауат организацияланы келечилери, Къабарты-Малкъарны вузларыны ректорлары къатышхандыла. 

Жыйылыуну башлай, республиканы Жамауат палатасыны башчысы Хазратали Бердов  власть органлада жамауат советле ишлерин тири бардыргъанларын белгилегенди. Ол билдиргенича, жамауат палата «КъМР-де толтуруучу власть органда эм иги жамауат совет», «Муниципал районда / шахар округда эм иги жамауат палата» деген эришиулени жыл сайын къурайды. Алагъа уллу борчла салынадыла, ол санда уа адамланы ышаныуларын ёсдюрюу.  
– Бюгюнлюкде Къабарты-Малкъарда министерстволада бла ведомстволада 22 жамауат совет, муниципалитетледе уа 13 жамауат палата бардыла. Ишлеген жылларыны ичинде ала кёп магъаналы иш тамамлагъандыла, хайырлы башламчылыкъла этгендиле, законопроектлени тинтиуге къатышхандыла. Бизни муратыбыз жашауда тюбей тургъан кемчиликлени кетериуде,  ахшы башламчылыкъланы бардырыуда жамауатны  бла властьны  кючлерин  бирикдириудю, – дегенди ол.  
Жамауат советле халкъ, бизнес бла властьны араларында байламлыкъланы тохташдырадыла, шёндю уа ачыкъ ушакъ бардырыуну магъанасы бек уллуду. Аланы болушлукълары бла адамла жарсыуларын айталадыла, себеплик да табадыла, предпринимательство тыйгъычсыз айнырча, бизнесни бардырыуда къыралны жанындан контроль этиуде эм ахшы мадарла табыладыла. 
Бу байламлыкъланы кючлер мурат бла Жамауат палата бла ФАС-ны регионда управлениясы бирге ишлеуню юсюнден келишим тауусхандыла. Управленияны башчысы Анна Кумахова келишим предпринимательствогъа болушлукъ этиуде, конкуренцияны айнытыуда, хайырлы программаланы жашауда бардырыуда алгъа атлам болгъанын чертгенди.

Кульчаланы Зульфия