КъМР-ни Башчысы Казбек Коков Къабарты-Малкъар Республиканы Терроргъа къажау комиссиясыны жыйылыуун бардыргъанды. Анга КъМР-ни Парламентини Председатели Татьяна Егорова, КъМР-ни Правительствосуну Председатели Мусукланы Алий, РФ-ни Президентини СКФО -да толу эркинликли келечисини аппаратыны тамата федерал инспектору Тимур Макоев, правительствону келечилери, право сакълаучу эм надзорлукъ этиу органланы, кюч структураланы, министерстволаны таматалары, муниципал къуралыуланы администрацияларыны оноучулары къатышхандыла.
Къыралда шёндюгюлю оператив болумгъа эмда федерал организацияланы бла ведомстволаны эсгертиулерине тийишлиликде кенгешде 1 эм 9 майда регионда асламла жыйылгъан тюбешиулени, ол санда шествияланы да, къурамазгъа оноу этилгенди. Жаз башыны эм Урунууну, Уллу Ата журт урушда Хорламны 78-жыллыгъына жораланнган байрамланы программаларына кёре тюрлю-тюрлю амалла бла бардырыллыкъдыла, онлайн халда, къоркъуусузлукъну жалчытыргъа онглары болгъан мекямланы ичинде эм башха объектледе.
Кенгешни чегинде транспорт инфраструктураны, отлукъ-энергетика комплексни, сатыу-алыу объектлени, адамла аслам жыйылгъан жерлени, дин организацияланы террорчулукъдан сакълау соруула сюзюлгендиле.
Право сакълаучу эм толтуруучу органланы баш борчлары терроризмни бла экстремизмни ниетлерине къажаулукъду, жаш тёлюню арасында радикал оюмланы жайылыуларын тыйыуду. Казбек Коков бу ызда аслам иш тындырылгъанын чертгенди, алай бусагъатда кюч салып, келишип эм бир бири бла байламлыкъ жюрютюп ишлеу бек магъаналыды. Битеулю профилактика жумушла энчи ишле бла бир ызда тамамланыргъа тийишлидиле. 
КъМР-ни жаш тёлюню ишлери жаны бла министри Азамат Люев «Мен – насийхатчы» деген комплекс проект башланнганын билдиргенди, ол къоркъуулу къауумгъа кирген акъылбалыкъ болмагъанла бла ишге жораланады. Колледжлени окъуучулары къошулгъан «Команда 5642» республикалы жаш тёлю форум хазырланады. Жаш тёлю бла ишлеген 140 специалистге урунуу даражаларын ёсдюрген курсла къураллыкъдыла, художестволу башчылагъа эм тренерлеге деп семинарла ётерикдиле. 
Терроризмни алгъадан окъуна болдурмаугъа бурулгъан проектлеге себеплик этилликди. Хар ызда иш бардырылады, ол санда жаш тёлю эм ата-анала биригиуледе да. Республикада билим бериу организацияланы мурдорларында 156 доброволец ара, 8 жаш тёлю бирлешме, Волонтёрлукъну айнытыу ресурс араны 12 муниципал бёлюмю жумушларын бардырадыла.
Казбек Коков министерствону бла муниципал администрацияланы ведомстволу аралы байламлыкълары бютюн кючлю болургъа тийишлисин белгилегенди. Жаш адамланы юйретиуде спорт тренерлени магъаналылыкъларына эм аланы болушлукълары бла халкъланы бирликлерини, шуёхлукъларыны, тёрели къыйматланы, патриотлукъну, адамланы араларында конфессияла эм маданият байламлыкъланы юсюнден айтыргъа боллугъуна эс бургъанды. Республиканы оноучусу Жаш тёлюню ишлери жаны бла министерствону билим бериу махкемеледе психология службаны кючлендирирге деген оюмун дурус кёрюп, анга тынгылы къараргъа буюргъанды.

КъМР-ни Башчысыны бла Правительствосуну пресс-службасы.