Налшык дэт Музыкэ театрым иджыблагъэ щагъэлъэгъуащ Чайковский Пётр и «Иолантэ» зы акт хъу оперэр.
Чайковскэм иужьрейуэ итхауэ къалъытэ оперэм хуэ-дэ имыIауэ жаIэ щIэныгъэлIхэм. Ар ди къэралым и щIы-пIэ куэдым ноби зэрыщагъэувыр а Iуэхум щыхьэт тохъуэ. Уи нэкIэ плъэгъуа иужькIэ гурыIуэгъуэ мэхъу абы режиссёрхэр дихьэхыу щIелэжьыр. Сыт зэмани цIыхум къыдекIуэкI гурыгъу-гурыщIэм, зэхэщIыкIым, дуней еплъыкIэм теухуащ мы тхыгъэ телъыджэр.
Герц Генри «Дочь короля Рене» и драмэр лъабжьэ зыхуэхъуа оперэр 1892 гъэм Петербург дэт Мариинскэ театрым япэу утыку къыщрахьауэ щытащ. Театр Иным ар щыщагъэувар 1893 гъэращ. НэгъуэщI щIыпIэхэм ящыщу ар япэ дыдэу Гамбург (1893 гъэ), абы яужь Копенгаген (1893 гъэ), Стокгольм (1893 гъэ), Мюнхен (1897 гъэ), Венэ (1900 гъэ), Болонья (1907 гъэ), Ослэ (1929 гъэ), Будапешт (1929 гъэ), Люблянэ (1938 гъэ) щагъэлъэгъуащ.
Совет зэманыр къэунэхуа нэужь 1923 гъэм Ленинград дэт Оперэ театр цIыкIум япэу щагъэуват. 1940 гъэм Театр Иным абы цIыхушхуэ щеплъауэ щытащ. Совет Союзым хыхьэ къалэхэу Ереван (1947 гъэ), Одессэ (1952 гъэ), Баку (1954 гъэ), Душанбе (1955 гъэ), Къэзан (1958 гъэ), Ашхабад (1959 гъэ), Алма-Ата (1961 гъэ) щагъэуват оперэр.
2015 гъэм ар икъукIэ дахэу утыку къыщрахьауэ щытащ Театр Иным. Ленинград щIыналъэм хыхьэ Ивангородскэ быдапIэм (2021 гъэ) а оперэм и лIыхъужь нэхъыщхьэм и ролыр щигъэзэщIауэ щытащ зи нэхэм ямылъагъу уэрэджыIакIуэ цIэрыIуэ Чэныб Нэфсэт. Абы цIыхуу къекIуэлIам яфIэтелъыджэ хъуат Нэфсэт и ролыр зэригъэзэщIамрэ и макъ гуакIуэмрэ.
Оперэ гъуазджэр зы щхьэкIэ нэхъ лъагэ зыщIауэ къалъытэ «Иолантэ»-р Налшык дэт Музыкэ театрым щылажьэхэми телъыджэу ди пащхьэ кърахьащ.
Театрым и артистхэр илъэс ныкъуэм щIигъукIэ елэжьащ мы оперэм. Абы и режиссёр Дэбагъуэ Роман илъэсипщI ипэкIэ, концерт щIыкIэм иту, ар къалэдэсхэм я пащхьэ кърихьауэ зэрыщытар куэ-дым ящIэж къыщIэкIынщ. Абы щыгъуэ Музыкэ театрыр зэрахьэрти, зыхуей хуэзэу бгъэувыну гугъут. Иджы ди республикэм щыпсэухэр оперэм зэрыщыту еплъыну Iэ-мал яIэщ. Ар теухуащ Рене пщым ипхъу хьэфизым. Рене (ролыр зыгъэзащIэр Красовский Алексейщ, Сац Наталие и цIэр зэрихьэу Москва дэт театрым и артистым) и пхъум и нэхэм зэрамылъагъур пщащэм щабзыщIыну унафэ ищIащи, псоми егугъуу щIахъумэ. Пщым и пхъум и ро-лыр Щоджэн СэIихьэт егъэзащIэ. Абыхэм я уардэунэм зыри щIагъэхьэркъым, хэт щIыхьэми яукIыну унафэ быдэ щыIэщ.
Илъэс бжыгъэкIэ хъыджэбзым кърагъащIэркъым и нэхэм зэрамылъагъур, нэхъ пэжу жыпIэмэ, хъыджэбзым ищIэркъым адрей цIыхухэм я нэм илъагъуу. Иолантэ и махуэхэр насыпыфIэу, и ныбжьэгъу хъыджэбзхэм яхэсу егъакIуэ. Ауэ гурыщхъуэ ищIу щIедзэ зыгуэр къыщабзы-щIу. Иолантэ зэрынэфым и закъуэкъым имыщIэр, абы жраIэркъым и адэр зэрыпщыр. Хъыджэбзым дохутыр Iэзэ кърагъэплъам жеIэ Иолантэ зэрынэфыр кърагъащIэмэ, хъужынкIэ хъуну. Пхъур хуэсакъыу зыхъумэ адэм идэркъым щэхур нахуэ ищIын, мэшынэ и пхъум и щхьэм мыгъуагъэ хуихьыжынкIэ.
Иолантэ зэрынэфыр адэ-кIи къищIэну хъунтэкъым, уардэунэм къэкIуа лIыхъусэжьитIыр къэмыхэшамэ. Водемон лIыхъусэжьым (ролыр Жубоев Джамболэт егъэзащIэ) хъыджэбзыр зэрилъагъуу и дахагъэм итхьэкъури, зэрымыщIэкIэ пэжыр жри-Iащ.
Iуэхур зытетыр къэзыщIа Иолантэ фIэщхъуныгъэ егъуэтри, и нэхэри къоплъэж.
Мы оперэм и гупсысэ нэхъыщхьэр цIыхум и дуней еплъыкIэр, лъагъукIэр и гум къызэрыщежьэрщ. Нэм илъагъум нэхърэ гум илъагъум нэхъ мыхьэнэшхуэ зэриIэрщ. ИкъукIэ телъыджэщ Иолантэ и нэхэр къэплъэжауэ утыкум къыщихьэ теплъэгъуэр. Абы и адэр, Ведемон, и ныбжьэгъу хъыджэбзхэр, къэзыухъуреихь дуней дахэр япэу илъагъуу аращ. ЦIыху къызэрыгуэкIхэр дызэсэжа дунейм зыщимыгъэнщIу зеплъыхь зи нэхэр къэплъэжа хъыджэбзым.
Оперэм и дирижёрыр КъБР-м щIыхь зиIэ и артист Щэбэтыкъуэ Заурщ. И адэ Натбий и Iуэхум пызыща щIалэр иджы япэу дирижёру утыку къихьащ.
«Иолантэ» оперэр балигъхэм папщIэ таурыхъ дахэщ, дэтхэнэми гупсысэ къызыхихынщ.
Инэрокъуэ Данэ.