«Россети Шимал Кавказ» компания Къабарты-Малкъарда борчла этип тургъан 232 инсан бла быйыл биринчи кварталда келишимле этгенди. Алагъа кёре, бу адамла борчларын кезиу-кезиу тёлеп жабаргъа боллукъдула. Энергетикле айтханларына кёре, аланы барыны да берликлери 1,7 миллион сомдан аслам болады. Келишимни хайырындан а, биринчиден, борчларыны ючден бирин тёлерге керекдиле. Къалгъанын а юч айны ичинде къайтарыргъа онглары боллукъду. Алагъа аллай амал кезиулю тёлеулерин заманында жабып турсала берилликди.

Компаниядан билдиргенлерине кёре, ала бу оноуну борчлары болгъанла къыйын жашау болумгъа тюшгенлерин эсге алып этгендиле. Башхача айтханда, бу инсанла ахчаны бир кезиуге чыгъарып бераллыкъ тюйюлдюле, алай токсуз къалыргъа да сюймейдиле.

Жангы объектле электрокюч бла жалчытынадыла

Энергетикле быйыл биринчи кварталда электрокюч сетьлеге Къабарты-Малкъардан 408 объектни къошхандыла. Аланы барына да 8,5 мегаватт берилликди. Тенглешдирип айтханда, бу кёрюмдю былтырдан эсе 26 процентге кёбюрек болгъанды, деп билдиргендиле «Россети Шимал Кавказ» компанияны республикада бёлюмюню-пресс-службасындан.

Сагъынылгъан объектлени арасында онюч социал магъаналы учреждение барды: онбир межгит, Кишпек элде Маданият юй, Сармаково элде орта школ ишлене тургъан жер. Аланы барында да электрокючню эсеплеген «акъыллы» приборла орнатылгъандыла. Ызы бла хар абонентни да токну автоматизация халда эсеплеген системагъа (АСКУЭ) къошхандыла. Ол а аны жиг-жиги бла тергейди, электрокюч сеть къалай ишлегенин кёргюзтеди, приборгъа адам тийсе да билдиреди - башхача айтханда, токну урларгъа къоймайды. Электрокючню багъасын заманында тёлемегенлени уа сетьледен, адамланы къозгъап, техниканы да чыгъарып айланмай, жерине да бара турмай кесерикдиле.

Бузукълукъну ахыры  тазирди

Электрокюч сетьлеге эркинликсиз къошулуу, токну эсеплеген приборну ишин тюрлендирирге кюрешиу игиге келтирлик тюйюлдю, дейдиле «Каббалкэнерго» компанияны пресс-службасында. Аны этген инсанлагъа тазир салынырыкъды.

Компанияны адамлары алай шарт болгъанын эслеселе, тийишли акт жазарыкъдыла, анга кёре токну кесерге да боллукъдула. Абонент а законсуз хайырланылгъан электрокючню багъасын толусунлай тёлерикди. Ол а нормативге кёре тергеледи, кеси да он кереге кёбейтилип алай.

Къара чёпге предприятие неда организация тюшсе - тёлеу башха боллукъду. Специалистле аны ёлчемин ол жерде орнатылгъан (ток бла ишлеген) битеу хар нени да кючлерин тергеп, ала кече-кюн тохтамай ишлеп тургъанча алай чыгъарадыла. Аллай амал болмаса уа, ары баргъан ыз бла не къадар кёп ток ётерге боллугъуна къарап алай. Дагъыда битеу ачыкъланнган бузукълукъланы юслеринден материалланы жарашдырып МВД-гъа жибередиле. Анда уа инсанны уголовный неда административ жууапха тартыргъа боллукъдула. Иш анга жетмезча, электрокючню хайырланыуда низамдан чыкъмазгъа керекди, дейдиле энергетикле.

Улбашланы Мурат хазырлагъанды.