Кёп болмай «Севкаврентген-Д» биригиуню келечилери,   Къабарты-Малкъар къырал университетни  аспиранты  Ахра Гогия бла физикадан  бла математикадан  институтну  студенти Кантемир Фиров Екатеринбургда  «Здравоохранение Урала 2023» деген медицина оборудованияны  тёртюнчю халкъла аралы кёрмючюне къатышхандыла.  

Бюгюнлюкде «Севкаврентген-Д» тюрлю-тюрлю  рентген оборудование чыгъарады, алыучугъа тапдырады, жарашдырыргъа болушады эм ремонт этеди.

Ахра Гогия бла  Кантемир Фиров биригиуню эм артда чыгъарылгъан модельлеринден бирин - палатагъа элтирге жарагъан «Парус» рентген аппаратны кёргюзтгендиле. Анга кёрмючде кёпле эс бургъандыла эм бюсюрегендиле. 

 Быллай оборудование  профосмотрла бардырыргъа  аламат жарайды. Андан сора да, аны рентген кабинетде, стационар бёлюмде,  терапияда, операция бардыргъан эм башха кезиуледе да хайырланыргъа боллукъду.

 «Здравоохранение Урала» деген кёрмюч  Россейде медицина бёлюм бла байламлы  эм уллуладн бирине саналады. Бу жол анга 160-дан аслам биригиу къатышханды.

Форумда аслам эс  санкцияланы кезиуюнде медицина учрежденияланы  техника бла жалчытыугъа,  оборудованиягъа ремонт этиуге,  медицинагъа  керек аберилени регионлада чыгъарыугъа,   тыш къыраллы оборудование бла дарманланы   орунуна кесибизникиле хайырланырча мадаргъа эс бурулгъанды.

Бизни корр.