Мы махуэхэм Къэбэрдей-Балъкъэрым щыIащ гуманитар IуэхухэмкIэ проект куэд зи гъусэу ягъэзэщIа, Дунейпсо зэпыщIэныгъэхэмкIэ Санкт-Петербург ассоциацэм - Санкт-Петербург и Хабзэубзыху Зэхуэсым и дэлэжьэгъум - и лIыкIуэ гуп. Абыхэм яхэ-тащ судыщIэ IэнатIэм, щIэныгъэ нэхъыщхьэ щрагъэгъуэт еджапIэхэм, туризмэм, щэнхабзэм, Къэрал Эрмитажым я лэжьакIуэхэр, хьэрычэтыщIэхэр.
Санкт-Петербург и Хабзэубзыху Зэхуэсымрэ КъБР-м и Парламентымрэ зэрызэдэлэжьэну зэгурыIуэныгъэм ипкъ иткIэ, депутатхэмрэ республикэм и хьэщIэхэмрэ я зэIущIэр екIуэкIащ.
- Санкт-Петербургрэ Къэбэрдей-Балъкъэрымрэ зэхущытыкIэфIхэр куэд щIауэ яку дэлъщ. Хабзэубзыху IэнатIэхэр зэрызэдэлэжьэнум теухуа зэгурыIуэныгъэм илъэси 10 ипэкIэ Iэ щIадзауэ щытащ. А илъэсхэм къриубыдэу къэралми щIыналъэхэми зэхъуэкIыныгъэ хъарзынэхэр зэрыщекIуэкIам къыхэкIыу, нобэрей зэманым къытхуигъэув жыпхъэхэмрэ иджырей Iэмалхэмрэ зи лъабжьэ ЗэгурыIуэныгъэщIэм дыхуэкIуэныр игъуэу къэтлъытащ, - жиIащ КъБР-м и Парламентым и УнафэщI Егоровэ Татьянэ. - Хабзэубзыху IэнатIэхэм я зэгурыIуэныгъэм къахуигъэувхэр жыджэру ягъэзащIэ, абы и щыхьэтщ ассоциацэм хэтхэр къызэрытхуеблэгъар.
Лъэпкъыр нэхъыфIу къызэрыпцIыхунур и щэнхабзэмкIэщ. Абы ипкъ иткIэ щэнхабзэ проектхэр зэгъусэу дгъэзэщIэным Iэмал имыIэу дыхущIэкъунущ. Апхуэдэуи, хуей хъумэ, гулъытэ яхуэтщIынущ къэрал унафэхэм я зэхэтыкIэм теухуа еплъыкIэ щхьэхуэхэм, дэтхэнэми куууэ зыщыдгъэгъуэзэнурэ унэтIыныгъэ зэхуэмыдэхэмкIэ щыIэ гугъуехьхэр зэгъусэу зэрызэфIэтхыным иужь дитынущ.
Егоровэм хьэщIэхэр щигъэгъуэзащ КъБР-м и Парламентым и IуэхущIафэхэм, УФ-м и Къэрал Думэм хабзэ и лъэныкъуэкIэ къыщыхалъхьэ я жэрдэмхэм, къэралым и щIыналъэхэм хуаIэ зэпыщIэныгъэхэм, республикэм и хабзэубзыху IэнатIэм и деж къыщызэрагъэпэща ЩIалэгъуалэ палатэм и лэжьыгъэм, нэгъуэщIхэми.
Къэбэрдей-Балъкъэрым и хьэщIэхэм зрагъэлъэгъуащ щIыналъэм и щIыпIэ дахэхэр. Дунейпсо зэпыщIэныгъэхэмкIэ Санкт-Петербург ассоциацэм и щIыналъэ жылагъуэ зэгухьэныгъэм и правленэм и унафэщIым и къуэдзэ Фроловэ Екатеринэ жиIащ республикэм и щIыуэпсым, абы и цIыхухэм я гуапагъэм, къраха хьэщIагъэм зэрыдихьэхар.
- Дэ дахуэзащ зи хабзэхэмрэ тхыдэмрэ пщIэ хуэзыщI цIыху псэ къабзэхэм. Ди ассоциацэм гулъытэ нэхъыбэ хуищI хъуащ къэралым и хэгъэгухэм, абыхэм я гъусэу егъэджэныгъэ, турист программэхэр къызэгъэпэщыным. Къалэшхуэхэмрэ къэралым и щIыналъэхэмрэ щыпсэухэр, псом хуэмыдэу щIалэгъуалэр, абыхэм я фIыгъэкIэ нэхъ зэрыщIэ мэхъу, къалэдэсхэм хэгъэгухэр къацIыху, - жиIащ абы.
Апхуэдэу Фроловэ Екатеринэ тепсэлъыхьащ Санкт-Петербург щыIэ, «Къару зыхэлъыр зэныбжьэгъугъэрщ» гуманитар зэпыщIэныгъэмкIэ дунейпсо клубым и лэжьыгъэм, абы и унэтIыныгъэхэм, къэкIуэнум хуэгъэпса и IуэхущIафэ-хэм.
ЗэIущIэм и гугъу щащIащ щэнхабзэмкIэ, туризмэмкIэ, егъэджэныгъэмкIэ, хьэрычэтыщIэ IуэхухэмкIэ дяпэкIэ зэрызэдэлэжьэнум. КъищынэмыщIауэ, хьэщIэхэм къагъэлъэгъуащ республикэм щэнхабзэ, творческэ фестивалхэр, нэгъуэщI Iуэхугъуэхэри зэгъусэу щегъэкIуэкIыным теухуа я еплъыкIэхэр.
