Шимал Осетия-Аланияда шахматладан «Владикавказны мэрини кубогу» деген эришиу къуралгъанды. Анга къыралны аслам регионундан 200-ге жууукъ спортчу жыйылгъандыла, аланы араларында кючлю шахматчыла, халкъала аралы даражалы устала да болгъандыла, ол санда Владислав Артемьев, Евгений Алексеев, Павел Смирнов эм башхала.   

 Къабарты-Малкъардан Владикавказгъа 20 адам баргъандыла. Блиц-турнир эки кесекге юлешиннгенди: жаш тёлю эм абадан. Жаш адамланы араларында барысында да ахшы Текуланы Эмир ойнагъанды, ол 11 баллдан 9,5 алгъанды. 8 баллны уа экинчи жерлешибиз Адам Ашижев къытханды. Абаданланы араларында экинчи жерге Фатима Шахмурзова чыкъгъанды. Кубокну экинчи кюнюнде терк шахматладан эришиуле болгъандыла, анда да талай спортчубуз саугъа жерлени алгъандыла.

Хорлагъанлагъа бла призёрлагъа кубокла, грамотала эм ахча берилгендиле.

Кульчаланы Зульфия.