Былтыр Къабарты-Малкъарда абери сатып алгъанла эмда жумушла ючюн ахча тёлегенле банк карточкаланы 47,4 кере хайырланнгандыла. Буруннгу жыл бла тенглешдиргенде, бу кёрюмдю беш процентге кёбейгенди. Ахча бла алып тергегенде уа, ол жети процент къошуп, 35,9 миллиард сомгъа жетгенди, деп билдиргендиле Россейни Миллет банкыны республикада бёлюмюню пресс-службасындан.

«Тёлеу технологияла эмда банк инфраструктура айный баргъанлары регионда финанс жумушланы жалчытыуда бек уллу къошумчулукъ этедиле. Аланы тамамларгъа себеплик этген оборудованияны саны бир жылны ичинде онбеш процентге аслам болгъанды. Аны иги кёрюмдюге санаргъа тийишлиди. Сёз ючюн, СКФО-да ол - 10,9, саулай къыралда уа - 7,5 процентди», - дегенди бёлюмню башчысы Аслан Калов.

Быйыл январь айны биринчисинде Къабарты-Малкъарда 528 банкомат эмда 7363 терминал бар эди. Тёлеу карталаны саны уа бир жылны ичинде бешден бирине асламыракъ болгъанды, аны бла бир миллиондан атлагъанды.

Улбашланы Мурат хазырлагъанды.