Ново-Ивановское элде жолгъа ремонт этиле турады. Аны узунлугъу 2,5 километрди. Ол кеси да элден Нальчик-Майский трассагъа чыгъады. Республиканы Транспорт эмда жол мюлк министерствосундан билдиргенлерича, ишчиле анда эски асфальтны къырып кетергендиле, ызы бла тюзетирча бир кере асфальт жайгъандыла. Энди уа аны жангы тюрлюсюн (зыгъыр-чайыр) жайыу бла кюреше турадыла. Аны бошагъандан сора жолну жанларын тап этерикдиле, белгиле да орнатырыкъдыла. Хар нени да бу жаз башында тамамларгъа таукелдиле.

Быллай ишле баргъан объектлеге «Управдор» ГКУ-ну качествогъа контроль этген бёлюмю кёз-къулакъ болады. Аны специалистлери жерине барып, асфальтны, бетонну, башха материалланы эмда хайырланылгъан амалланы тинтедиле, ала белгиленнген излемлеге нечик келишгенлерин тохташдырадыла.

Специалистле кёп болмай Экинчи Чегем – Булунгу эмда Огъары Малкъар – Мухол жоллагъа бла Заюково элде кёпюрге кёз жетдиргендиле. Объектлеге келген бетон къатхынчы, андан проба аладыла, энчи оруннга къуюп къатдырадыла, ызы бла, 28 кюн озгъандан сора, лабораторияда тинтедиле. Качествогъа контроль тынгылы эмда заманында этилсе, объектледе бардырылгъан ишлени юсю бла артда сёз чыгъарыкъ тюйюлдю, деп белгилегендиле ведомствода.

Улбашланы Мурат хазырлагъанды.