КъБР-м и Парламентым щекIуэкIащ ЩIалэ­гъуалэ палатэм и еянэ зэхыхьэгъуэм хэтынухэр къыщыхах зэIущIэ. Абы хыхьэну хуейуэ цIыху 50 щызэхуэсат хабзэубзыху орган нэхъыщхьэм. 

ЩIалэгъуалэм я зэфIэкIыр здынэсыр къапщытащ КъБР-м и Парламентым ЕгъэджэныгъэмкIэ, щIэныгъэмрэ щIалэгъуалэм я IуэхухэмкIэ и ­комитетымрэ КъэпщытакIуэ гупым хэтхэмрэ. Ма­хуищкIэ екIуэкIа къэпщытэныгъэ лэжьыгъэм зригъэхьэлIащ КъБР-м и Парламентым и УнафэщI Егоровэ Татьянэ. Абы жиIащ КъБР-м и Парламентым псом япэ иригъэщ Iуэхугъуэхэм щIалэгъуалэм теухуар зэ­рыхиубыдэр, къэралым щыяпэу ЩIа­лэгъуалэ палатэ ди деж къызэрыщызэIуахар абы щыхьэт зэрытехъуэр. 
- Хуабжьу си гуапэ хъуащ махуищым къриубы­­-дэу дызыхуэза, дызэпсэлъа щIалэгъуалэр Iуэхум зэрыдихьэхыр. Иджыри лэжьыгъэшхуэ къытпэщылъщ: абыхэм я зэфIэкIым дыхэплъэжу, Iуэ­хум нэхъ хэзыщIыкIхэр, жэрдэмщIакIуэхэр, жы­джэрхэр къыхэтхын хуейщ, - къыхигъэщащ Егоровэм. 
КъБР-м и Парламентым ЕгъэджэныгъэмкIэ, щIэныгъэмрэ щIалэгъуалэм я IуэхуэмкIэ и коми­тетым и унафэщI Емуз Нинэ зэрыжиIамкIэ, ЩIа­лэгъуалэ палатэ зэхэшэным теухуа хабзэм къызэ­ригъэувым тету, щIалэхэмрэ пщащэхэмрэ я дэф­тэрхэр республикэ жылагъуэ зэгухьэныгъэхэм, ­районхэмрэ къалэхэмрэ я щIыпIэ самоуправ­ленэхэм, политикэ партхэм я Къэбэрдей-Балъкъэр щIыналъэ къудамэхэм, университетхэмрэ кол­леджхэмрэ я студент зэгухьэныгъэхэм къабгъэдэкIащ. 
Дэтхэнэ зы ныбжьыщIэми Iэмал иIащ и зэфIэ­кIыр къэпщытакIуэ гупым я пащхьэ ирихьэну, абыхэм я упщIэхэм жэуап яритыну, жылагъуэ гъащIэм щигъэзащIэ къалэнхэм тепсэлъыхьыну. ЩIалэгъуалэ палатэм хэтхэм ягъэзэщIэну зыхуей ­проектхэм, щыIэ гугъуехьхэм я хэкIыпIэу ялъа­гъу­хэм, щIэблэм драгъэкIуэкI лэжьыгъэр нэхъ­ри зэрегъэфIэкIуапхъэ Iэмалхэм ятеухуауэ къэп­сэлъащ зэпеуэм хэтыну Парламентым къе­кIуэ­лIахэр. 
Зэхьэзэхуэм кърикIуахэмкIэ ЩIалэгъуалэ палатэм хагъэхьэну зыхуэфащэхэр къыхахащ. Абы теу­хуа унафэр КъБР-м и Парламентым и зи чэзу зэ­IущIэм къыщащтэнущ. 

КъБР-м и Парламентым и пресс-IуэхущIапIэ.