КъБР-м и Музыкэ театрым концерт гукъинэжкIэ щагъэлъэпIащ Балъкъэр лъэп­къым и къэщIэ­рэ­щIэжы­ны­гъэм и махуэр.
 
Махуэшхуэм щIэдзапIэ хуэхъуащ балъкъэр лъэпкъыр я хэкум щрагъэIэпхъукIам ­теухуа тхыдэ напэкIуэцI гузэ­вэгъуэр. Илъэс 79-кIэ узэ­Iэ­бэкIыжмэ, 1944 гъэм гъатхэпэм и 8-м балъкъэр мин ­38-рэ, сыхьэтитIым къриу­быдэу, Къэбэрдей-Балъкъэ­рым залымыгъэкIэ ирашри, Азие Курытымрэ Къэзахъс­танымрэ ягъэIэпхъуащ. А бжыгъэм и зэхуэдитIым щIигъур сабийт. Балъкъэрхэм насыпыншагъэ ин къатепсыхат зы жэщым къриубыдэу        я лъахэм залымыгъэкIэ щра­гъэ­IэпхъукIам. А гуауэ­шхуэр къызэзынэкIыфа лъэпкъыр СССР-м и Совет Нэхъыщхьэм и Президиумым и унафэкIэ хуит ящIащ я хэкум къагъэзэжыну, Къэбэрдей-Балъкъэр автономнэ республикэр къызэрагъэпэ­щы­жыну 1957 гъэм гъатхэпэм и 28-м. КъБР-м и япэ Президент КIуэкIуэ Валерэ и уна­фэкIэ 1994 гъэм къыхалъхьащ Балъ­къэр лъэпкъым  и къэщIэ­рэщIэжыныгъэм и  махуэр гъат­хэпэм и 28-м ягъэ­лъэ­пIэну икIи ар зыгъэпсэхугъуэ махуэу ягъэуващ. 
Къэбэрдей-Балъкъэрым и Iэтащхьэм и хъуэхъу тхыгъэм къеджащ КъБР-м и Прави­тельст­вэм и УнафэщIым и къуэ­дзэ Хъубий Марат. 
- ПщIэ зыхуэсщI си лъэп­къэгъу­хэ, гъатхэпэм и 28-м ди республикэм щыдогъэлъапIэ Балъкъэр лъэпкъым и къэ­щIэрэщIэжыныгъэм и махуэр. Махуэшхуэр захуагъэмрэ пэ­жыгъэмрэ я дамыгъэщ. Хэкум залымыгъэкIэ ирагъэIэпхъукIа балъкъэр лъэпкъым гугъуехьхэр къызэранэкIри, я тхыдэ щIыналъэм къагъэзэжащ. КъыкIэлъыкIуэ илъэс­хэм гъащIэ и лъэныкъуэкIэ унэтIыныгъэ куэдым ехъулIэ­ныгъэхэр щызыIэрагъэхьащ, я щэнхабзэ, псэкупсэ щы­тыкIэхэр ирагъэфIэкIуащ. Но­бэ балъкъэрхэр республикэм щыпсэу нэгъуэщI лъэпкъхэм ядогъуэгурыкIуэ пыщIэныгъэ быдэ хуаIэу, зэгурыIуэ яку илъу, Къэбэрдей-Балъкъэрыр егъэфIэкIуэнымрэ зегъэу­жьы­нымрэ хэлъхьэныгъэфI­хэр хуащIу. Шэч къытесхьэркъым дызэкъуэтмэ, зэманым и гугъуехь псори къызэрызэднэкIыфынумрэ къытпэщылъ къалэнхэм дазэрыпэлъэщынумрэ. Республикэм исхэм гукIи псэкIи сынывохъуэхъу махуэшхуэмкIэ! Узыншагъэ, гуа­пагъэ, насып, ехъулIэныгъэ фиIэну си гуапэщ! - итщ тхыгъэм. 
Махуэшхуэ пшыхьым хэтащ КъБР-м и Парламентымрэ Правительствэмрэ я лэжьа­кIуэхэр. 
Концертыр ягъэдэхащ Теппеев Алим, Габаев Тенджыз, Мусукаев Руслан, Текуев Амур, Бойченкэ Аллэ, Атмурзаевэ Танзилэ, Жаникаев Эль­дар. Апхуэдэу уэрэ­джы­IакIуэ, узэщIакIуэ цIэрыIуэ Отаров Омар игъэзащIэ уэрэдхэм я видеохэр пшы­хьым хыхьэу къатащ, Мечиев Кязим и усэхэр ягъэIуащ. Республикэр зэрыгушхуэ «Бал­кария», «Кабардинка», «Тэрч къэзакъхэр», «Насып», «Гордость Кавказа» къэфакIуэ гупхэми концертым зыкъыщагъэлъэгъуащ. Музыкэ театрым и пэIущIэ пэшым хьэщIэхэм папщIэ щагъэлъэгъуащ КъБР-м СурэтыщI ­гъуазджэхэмкIэ и музейм и гъэ­тIылъыгъэхэм къыхаха сурэтхэр. 

ТЕКIУЖЬ Заретэ.
Сурэтхэр Къарей Элинэ трихащ.